pilersaarut
Nuummi ineriartortitsinissamut pilersaarutit Sulisitsisut taperserpaat
Nuuk nunatsinni ineriartornermi qitiussaaq, Nuummi Sulisitsisut isumaqarput
Sulisitsisut Nuummi immikkoortoqarfiata illoqarfimmi ineriartortitsinissamut pilersaarutit taperserpai. Peqatigiiffiup tamatuma saniatigut sanaartornissamut suliniutit angisuut pitsaanerusumik ataqatigiissaarneqartarnissaa piumasaraa, inuussutissarsiortut taamaalillutik annertuumik nikerarnerit pinngitsoortarniassammatigit.
Tamatumalu saniatigut illoqarfiit pingaarnersaata pilersaarutai annertuut nunat tamakkerlugu sulisitsisut iluaqutaassanerarpaat.
Atuaruk: Sanaartornermut pilersaarusiaq suliffissanik pilersitsissaaq
- Illoqarfinnut nuuttarneq piviusuuvoq, kisianni Nuummi ineriartornerup Kalaallit Nunaannut tamanut tapiliutaanissaa pingaaruteqarpoq, Nungo Pedersen, Nuummi Sulisitsisut siulittaasuat tusagassiuutinut nalunaarummi allappoq.
Ineriartornissamut periarfissaq
Nuummi Sulisitsisut ataatsimeersuarneranni naammassineqaqqammertumi, illoqarfiit pingaarnersaannut periusissiaq periarfissanik nutaanik pilersitsisoq Nungo Pedersenip oqaatigaa.
- Nuummi pmittarfiup tallineqarnissaanut pilersaarummut aamma talittarfiup aasaru atorneqalertussamut ataqatigiitikkaanni, taava illoqarfiit pingaarnersaannut periusissiaq inuussutissarsiortunut suliaqarnissamik nutaamik tunngavissamik pilersitsivoq, taamaalilluni Nuuk nunatta sinneranut kalittuusinnaavoq, Nungo Pedersen naqissusiivoq.
Atuaruk: Nunatta oqaluttuarisaanerani inissianut pilersaarut annerpaaq
Pisortanit ataqatigiissaarinerit pitsaanngitsut
Tamatuma saniatigut kommunip sanaartortitsinissamut suliniutinut pilersaarutit suliffeqarfinnut unammillernartorujussuusut oqaatigai.
Tassami pisortat ataqatigiissaarisarnerat maannamut pitsaasimanngilaq. Piffissap ilaani suliniuterpassuusarsimapput, suliffeqarfiillu malinnaaniarnermik ajornartorsiorsimapput.
Atuaruk: Illoqarfiup immikkortua nutaaq sullorsuarmik Nuummut atassuteqassaaq
Piffissamilu allami suliassakippallaartarluni suliffissaaleqineq annertusisarpoq. Tamanna inuiaqatigiinnut suliffeqarfinnullu akisuvoq.
- Sanaartortitsinermut suliniutit annertuut ungasissumut isigaluni pilersaarusiorneqartassapput, taamaalilluni uliffeqarfiit anginerit minnerillu peqataasinnaassapput, nukissanillu pitsaanerpaamik atuilluarsinnaanerussallutik, Nungo Pedersen naqissusiivoq.
- Pitsaanerusumik pilersaarusiorneq aalajaannerlu sanaartornermik sulialinnut praktikkerfissanik amerlanerusumik pilersitsissaaq, aammalu inuusuttut ilinniarnissamut periarfissagissaarnerunissaa Nuummi Sulisitsisut ilungersuussaavoq.
Atuaruk: Innuttaasut affaat Nuummi najugaqassapput
- Kalaallit Nunaat nutaanik isertitaqarnissamik nassaartariaqarpoq; tamatumalu piginnaanngorluni ilinniakkanik naammassinnittut amerlanerujussuunissaat pisariaqartippaa.
Tamatumunnga atatillugu nunap politikkikkut ataatsimut isigalugu aaqqissuusseqqinnissaq aallartissimanngimmat uggoraa.
- Ungasissumut isigaluni eqqarsaatigilluakkanik aaqqissuusseqqittoqanngippat, inuiaqatigiit ineriartortinnissaannut akissaqanngilagut, Nungo Pedersen oqarpoq.