Ilulissat
Ole Dorph: Innuttaasut amerlasuut ajunaarnermit aalassatinneqarput
Nuliariit Fredericiameersut Inger aamma Ole Davidsen iluliarmiorpassuarnit ilisarisimaneqarput. – Amerlaqisut aalassatsinneqarput, taama oqarpoq Ole Dorph
- Ajoraluaqaaq, inuiaqatigiinnguit Ilulissani ajunaarnermit tupatsinneqarput, taama oqarpoq Qaasuitsup Kommuniani borgmesteri Ole Dorph, Siumut, Sermitsiaq.AG-mut.
Qallunaat nuliariit Davidsenikkut kalaallit meerartaat Fredericiamut atuariartoraangata meerarsiarisarpaat.
- Ilulissani amerlaqisugut, nuliariit Inger aamma Ole Davidsen qanittumik ilisarisimasaraavut. Ilulissanut akuttunngitsumik tikittarput illoqarfitsinnillu asannittuullutik. Nuliariit atuartorpassuarnik ukiorpassuit ingerlanerinni meerarsiaqartarput, tassa angerlasimaffimminniititaqartarlutik Fredericiami, Ole Dorph oqarpoq.
- Ingeri (Inger Davidsen aaqq.) illoqarfiivut, Ilulissat Fredericiallu, attaveqaatigiinnissaat pillugu suliniuteqarluarsimasuuvoq, illoqarfittummi taakku ikinngutigaavut, borgmesteri oqaluttuarpoq.
Aamma atuaruk: Kommunimi ilisimaneqartoq ajunaartoq
Aamma atuaruk: Qallunaat aappariit ajunaarput
Angallassisoq tammaasaq iluliarmiuuvoq
Angallassisoq ilulissaneersuuvoq. Atia suli ilisimatitsissutigineqanngilaq. Naallu nassaarinissaanut periarfissat annikilliartuaaraluartut borgmesteri suli neriuuteqarpoq politiit nassaariumaaraat.
- Angallassisoq ilisarisimasaraarput. Angalassisartuuvoq qimussiussarsartuullunilu misilittagartooq, aamma illoqarfitsinni peqatigiiffeqarnermik suliaqarluartuulluni. Soorunami neriuutigaarput nassaarineqarnissaa, taama oqarpoq borgmester Ole Dorph, qimagaasunut misiginneqatiginninninilu oqaatigalugu.