tusarnaartitsineq
Ole Kristiansen Nuummi tusarnaartitsilerpoq
Katuap paarlersuani tusarnaartitsisoqassamaalerpoq
Ukiut 25-it qaangiupput Ole Kristiansenip cd-liaqqaanni ’Isimiit Iikkamut’ saqqummersimmagu. Tassaniipput erinnat tusaqqoornartut nuannarinnittaanit ulloq manna tikillugu suli nuannarisaaqisut. Tamanna malunnartinniarlugu Katuami pingasunngornermi unnukkut tusarnaartitsisoqassaaq.
Ole Kristiansen nipilersoqataalu sapaatip akunnerata naanerani Ilulissani imerniartarfimmi Naleqqami nipilersoreerlutik Katuami appisimaartussanngorput.
- Periarfissaq taanna assut iluarpoq taamaasilluta erinnat tusarnaartitsinermi atugassagut sungiusarluarsinnaagatsigit, Ole Kristiansen Sermitsiaq.AG-mut oqarpoq.
Ole Kristiansen nipilersoqataalu tassaasut Gustav Ostermann qatitoortoq, Viila Sandgreen kitaarersoq aamma Julius Larsen tumerparpaartoq atugassaminnik piareersaareersimapput. Tusarnaartitsinissaq marlunnut avissimavaat taakkulu immikkoortut tamarmik 1 time sinnilaarlugu sivisussuseqartassapput.
- Erinnat ’Isimiit Ikkamut’-miit aamma ’Pop Uummataaruffimmi’eernerusut appisimaassavagut. Aamma erinnat suli saqqummernikuunngitsut appissavagut, Ole Kristiansen oqarpoq.
Katuami tusarnaartitsineq nalunaaqutaq 22.00 aallartissaaq.