"Oqalliffik" nunarsuaq tamakkerlugu peqataaffigineqartoq Reykjavikimi aallartippoq
Naalakkersuisut, kattuffiit, suliffeqarfiit, ilisimatusarfiit, eqqarsaqatigiit, avatangiisit pillugit peqatigiiffiit, inuiaqatigiit nunap inoqqaavi aamma innuttaasut ernumassuteqartut sapaatip-akunnerani matumani Islandip illoqarfiisa pingaarnersaanni Issittup siunissaa pillugu oqallinniarlutik katersuupput. Kalaallit aallartitaat peqataasunut ilaapput.
Ukiumoortumik Arctic Circle Assembly, Islandimi Reykjavikimi ingerlanneqartoq, ullumikkut sisamanngornermi aallartippoq. 700-nit amerlanerusunik oqalugiartoqarluni 200-nik amerlanerusunik ingerlatsinerni inuit 2000-nit amerlanerusut nunanit 70-nit amerlanerusunit Europamit, Asiamit, Afrikamit, Amerika Avannarlermit, Amerika Kujallermit aamma Australiamit peqataapput.
Kalaallit Nunaat sinnerlugu folketingimut ilaasortaq Aaja Chemnitz (IA), ICC-mi siulittaasoq Sara Olsvig aamma inuussutissarsiornermut, niuernermut, aatsitassanut, inatsisinik atuutsitsinermut naligiissitaanermullu naalakkersuisoq, Naaja Nathanielsen (IA) peqataapput.
Aaja Chemnitz ilaatigut Kalaallit Nunaata nunani tamalaani aaqqissuussaanermut ilaanera pillugu aammalu Canadamut USA-mullu attaveqarnerit pillugit oqallittunut ilaassaaq, Sara Olsvigip ataatsimeersuarneq Norge pillugu oqallinnermut Issittumi Siunnersuisoqatigiinni siulittaasutut, siunnersuisoqatigiit periarfissai ilungersuutissaalu pillugit aallarniutigalugu peqataassalluni.
Silap pissusia, aningaasaqarneq aamma sillimaniarnermut politikki
Arctic Circle Assembly ammaanersiorlugu oqalugiartut ilagissavaat Katrín Jakobsdóttir, Islandimi ministeriuneq; Lars Løkke Rasmussen, Danmarkimi nunanut allanut ministeri; Dr. Sultan Ahmed Al Jaber, GOP28-imi præsidenti; kiisalu nunanit arfineq-marlunnit sila pillugu ministerit.
Aammattaaq Savalimmiuni nunanut allanut, suliffeqarfinnut niuernermut ministeri aamma ministeriunerup tullia, Høgni Hoydal peqataassaaq, Dan Vandal, Canadap naalakkersuisuini nunanut avannarlernut tunngasunut ministeri peqatigalugu.
Sisamanngornermi kingusinnerusukkut aamma Issittumi siunissami aningaasaliinerit pillugit oqallittoqassaaq. Assemblymi sammisanut pingaarnernut nukissiuutit, silap pissusia, sermit iigartartut aakkiartornerat, imartat, sillimaniarneq aamma illersornissaq, nunarsuarmi nunap inoqqaavini aqutsineq aamma pisinnaatitaaffii ilaapput.
Arctic Circle pillugu
Arctic Circle Issittumut nunarsuatsinnullu nunani tamalaani oqaloqatigiittarfiit suleqatigiittarfiillu attaveqarfiit annersaraat. Tamat peqataaffigisaannik ammasuuvoq, kattuffiit, suliffeqarfiit, ilisimatusarfiit, eqqarsaqatigiit, avatangiisit pillugit peqatigiiffiit, inuiaqatigiit nunap inoqqaavi aamma innuttaasut ernumassuteqartut soqutigisaqartullu allat peqatigiiffigisaat. Kattuffik iluanaaruteqarfiunngilaq aamma arlaannaanulluunniit attuumassuteqanngilaq.
Arctic Circle Assembly 2013-imili Islandimi Koncertsal og Konferencecenterimi nunanit 60-nit amerlanerusunit 2000-t sinnerlugit ukiut tamaasa ingerlanneqartarpoq.