Oqarasuaatinik akornusersuineq
Telep tv-signali digitaliusoq Nuummi ikkussorpaa, taamaattumillu mobilit tv-llu aqqutai ulluni tulliuttuni akornusersorneqarsinnaapput.
Kalaallit Nunaat tamakkerlugu tv-mut signalip digitaliusup (DVB-T-p, Digital Video Broadcast) atulernissaa suliaralugu Tele aallarteruttorpoq.
Atulersinneqarnissaa Kujataani juunimi aallartippoq, mannalu tikillugu Nanortalimmiit Paamiut tungaanut illoqarfinni atortulersuisoqareerpoq.
Maanna Nuummi atortulersuineq aallartinneqarpoq, tassungalu atasumik antennenik suliaqarnermi GSM-imut signali aamma Nuuk TV-p signalia Tele Greenlandip illorsuata qanittuaniittoq qaminneqassapput, Tele Greenland ilisimatitsivoq.
Nuummi GSM-imut attavininniarneq piffissami suliaqarnerup nalaani ajornakusoortassaaq, Nuummilu tv-p kanalii tamarmik isiginnaarneqarsinnaasassanngillat.
Piffissani ataani allassimasuni attaviit qaminneqartassapput:
Pingasunngorneq ulloq 21-07-2010 nal. 08:00-miit nal. 12:00-imut
Sisamanngorneq ulloq 22-07-2010 nal. 08:00-miit nal. 16:00-imut
Tallimanngorneq ulloq 23-07-2010 nal. 08:00-miit nal. 12:00-imut.
Atulersitsiartuaarneq matuma kingorna ingerlaqqissaaq Maniitsumut Sisimiunullu, ukiullu naannginnerani naatsorsuutigineqarpoq atortut taamatuttaaq Qeqertarsuup Tunuani Uummannamilu ikkussuunneqarsimassasut.
Nunaqarfinnut sakkortusaavitsigut attaviit Telep aammattaaq sakkortusarlugit aallartippai, taamaalillutik tv-p signalii digitaliusut piffissap sanaartorfiusussap tulliani nunaqarfinni atulersikkiartuaarneqassallutik.