Inatsisartut
Oqartussaaffiit nuunneqarnissaannut pilersaarut piariilersoq
Danskit naalagaaffiannit oqartussaaffiit nunatsinnut nuunneqarnissaat qanoq akeqassanersut, Naalakkersuisut misissuleruttorpaat
Namminersorneq pillugu inatsimmi oqartussaaffiit taaneqartut nunatsinnut nuunneqarnissaannut qulaajaanissamik, upernaakkut 2018-imi kingusinnerpaamik Naalakkersuisut saqqummiussissapput.
Naalakkersuisut siulittaasuata Kim Kielsenip (S), Aqqaluaq B. Egedep (IA) siunnersuutaanut akissutaani tamanna atuarneqarsinnaavoq.
Atuaruk: Sullivinnik Nakkutilliisoqarfik akisussaaffigilerniaraat
Aningaasaqarnikkut kingunissaanik qulaajaaneq
Namminersorneq pillugu inatsit akisussaaffinnik 32-nik allattorsimasunik imaqarpoq, taakku oqartussaaffigilernissaanut Kalaallit Nunaat periarfissaqarpoq. Tassunga tunngatillugu Aqqaluaq B. Egede siunnersuuteqarpoq, taakku oqartussaaffiit 32-t tiguniaraanni aningaasaqarnikkut kingunissat qulaajarneqassasut ilaatigut siunnersuutigaa.
Atuaruk: Suliassaqarfik annertooq akisussaaffigineqalissaaq
Ingammik aatsitassat sorliit Nunatta avammut niuerutigisinnaaneranik oqallinnerup, namminersorneq pillugu inatsimmik nalorninartoqalersitsisoq, taanna isumaqarpoq.
- Aaqqiisoqartariaqarmat, paatsuungasoqartariaqanngimmat aamma nunatta inuisalu iluaqutiginerpaasinnaasaat suunersut ersaissumik paasineqarsimanissaat pisariaqarmat, Aqqaluaq B. Egede, siunnersuummut tunngavilersuutimi allappoq.
Siunnersuut siornarnisaq
Kisianni aallartereerpugut, Naalakkersuisut siulittaasuat Kim Kielsen (S) taama qisuariarpoq, 2015-imi ukiaanerani ataatsimiinnermi oqartussaaffiit nuunneqarnerisa kingunissaannik qulaajaanissamik Naalakkersuisut peqqusisimasut maluginiaqquaa.
Naalakkersuisut Danmarkimi Finansministeria suleqatigalugu Namminersorneq pillugu Inatsimmi bilag 1-imi allassimasut massakkut Naalagaaffimmit ingerlanneqarnerinut aningaasartuutaasartut aallarniutaasumik misissuiffigileruttorpaat.
- Tassa taamatut misissuineq aallartinneqareerpoq, Kim Kielsen akissummini allappoq.
Siunnersuut tusaatissatut tiguneqassasoq aammalu siunnersuut una sulianut aallartinneqareersunut ilanngullugu Naalakkersuisunit suliarineqassasoq, taanna isumaqarpoq.