Otto orpilialiorpoq

Otto Steenholdt 70,-nik ukiulik ullumikkut Aalborgip eqqaani Klarupimi najugaqartoq eqqaakululerluni juullip qaammataani orpilialiorumallerpoq, soorlu Aasiaat eqqaani Qeqertarsuatsiami meeraalluni ataatani taamaaliortartoq.

Otto aamma Hannes Steenholdt ilaquttaminnut ilaatigut imaattunik juullimut inuussuaqqussuteqarput:
"Juulli qanilliartoroiq Qeqertarsuatsiamilu meeraaninni juulli eqqarsaatigiuaannalerpara. Poortugarsiortorneq ajorpugut nuannaarlutali ataatarput anaanarpullu peqatigalugit juullisiortarluta.
Eqqarsaatigeriartigu ataatarput qanoq orpilialiortarnersoq, savik ukusartoq taamaallaat atorlugu, taamaattumillu orpiup avalequtai kanaartaanut ikkumminaatsittarlugit. Eqqaamavisiuk avalequtai ilaannikkut orpiliartilluta nakkartartut? Naneruuteeqqqat nakkartut peerniapallattarpavut, taamaanngippammi avalequtit allat paneqisut ikuallassinnaammata.
Ukioq manna nammineq taamaattumik orpilialiorpunga, naak maani nunami pitsassuarnik orpeqaraluartoq. Ataamata ukusartumik savilerluni sanasarneranut naleqqiullunga sannavinnguanni sakkorpassuaqarpunga."

Otto Steenholdt oqaluttuarpoq qanga orpilialiaasarsimavoq aallaqqaammut inimiitinneqartartoq, orpiulli meqqutaasat katappallaaeraangata naatsiivimmut anninneqartarpoq, Hanne Steenholdtip oqiliallaatigeqisaanik, taannami orpivimmik inimiittoqarusuttarpoq.

Otto Steenholdt oqlauttuarpoq meeraalluni orpiliaq paarnaqutinik sumiiffimmi nassaanik sananeqartartoq. Kalaallit Nunaani sumiiffinni allani kakillarnat atorneqartarput orpiit pissarsiarineqarsinnaanngikkallarmata.

Ottokkunni orpiliaq inimiingaatsiarneq ajormat isumaqarpoq naneruuteerannguit qaqortut aappaluttullu asuliissanngimmata adventimut atorneqartartut.

Oqaatsitigut ilitsersuuteqalaarpoq, orpiliamik taaguut orpimmik nammineq sanaanik tunngaveqartoq.