Paamiut kiisami mittarfittaarpoq
Arfininngorpat Paamiuni Mittarfik atoqqaartinneqarpat innuttaasut festerlutillu kaffeqarlunilu nereqatigiinnersuaqassaaq.
Arfininngorpat decembarip 1-iani Paamiuni innuttaasut nuannatsinniarneqarput, mittarfittaartik tikeraat akimasuut soorlu Naalakkersuisut siulittaasuat Hans Enoksen, Ineqarnermut Attaveqarnermullu Naalakkersuisoq Kim Kielsen, Naalakkersuisunut ilaasortat Siverth K. Heilmann, Finn Karlsen aamma Arkalo Abelsen, kiisalu allaffeqarfimmi pisortaaneq Kaj Kleist, peqatigalugit atoqaarfissiulerpassuk. Taamak Namminersornerusut tusagassiorfinnut nalunaarummi nalunaarput.
Paamiuni innuttaasut kaffisuunnerup, nerisassanik sassaallernerup, nerersuaqatigiinnerup qummoroortarnersuullu saniatigut illoqarfitsinik Air Greenlandip tunissutitut akeqanngitsumik timmisartuussineratigut qulaaniit isiginnaarsinnaassavaat.
Mittarfik nunap immikkoortortaani mittarfiit arfineq-marluusut Kalallit Nunaanni Namminersornerullutik Oqartussat ukiuni kingullerni aningaasalersorsimasaasa kingullersaraat.
Mittarfik 799 meterinik takissuseqartoq, mittarfimmut aqqusineq illutallu mittarfeqarfimmut atasut atortullu katillugit tamarmik 160 mio. kr.-it sinnerlugit akeqarput. Mittarfimmut aqqusineq 1998-imi sananeqarpoq, mittarfittavia mittarfiullu illutai naammasseqqammertut.
Mittarfik atoqqaartinneqareerpat Air Greenland A/S-ip Paamiut niuernerpalaartumik timmisartuussivigisalissavaa, timmisartoq Dash 7 46-t tikillugit ilaasortarsinnaasoq atorlugu.