Paasiniaaneq ingerlavoq: Peerstaat Isaksen periarfeerunneqarpoq

Peerstaat Isaksen 35-nik ukiulik suli nassaarineqanngilaq.

Politiit innuttaasut saaffiginninneri malillugit paasiniaallutillu ujaasisarsimasut, taama ilisimatitsipput.

Politikommissær Qaqortumi politiit pisortaat, Søren Arnth Hansen ilisimatitsivoq arnap 35-nik ukiullip ujaarineqalerneranit innutaasut arlallit saaffiginnissimasut.

- Saaffiginnissutit tamaasa paasiniaanitsinni misissorpagut, taamaattoq arnaq maqaasineqartoq suli nassaarineqanngilaq. Maannakkorpiaq paasiniarsinnaasatsinnik amigaateqarpugut, Søren Arnth Hansen Sermitsiaq.AG-mut oqarpoq.

Pinerluttoqarsimasinnaaneranut pasinartoqanngilaq

Qaqortumi politiit ilisimatitsipput suliami pinerluttoqarsimasinnaaneranik pasinartoqanngitsoq. Pinerluttoqarsimasinnaanerali suli oqaatigineqarsinnaanngikkallarpoq.

Arnaq maqaasineqartoq: - 35-nik ukiulik - ca. 155 cm-isut angitigisoq - nerinnattoq - qorsorpaluttoq taartumik kavaajaqarpoq, aappalorujuttumik tujuuluaraqarluni, qernertunik qarleqarluni tunguusanillu qalipaalinnik kameqarluni.

Paasissutissat kingulliit naapertorlugit maqaasineqartoq ataasinngornermi 22. november nal. 22.00-23.00 akornanni kingullermik takuneqarsimavoq Qaqortumi Bygning 7-miit anisoq.

- Innuttaasut suli kaammattorpagut sumut ingerlasimaneranik ilisimasaqarunik tammarneranulluunniit paasissutissaateqarunik piaartumik politiinut nalunaaqqullugit, politikommissær Søren Arnth Hansen oqarpoq.

Suliamut tunngatillugu paasissutissaateqartut politiinut attaveqaqquneqarput, uunga 701448.