ujaasineq
Palu Brobergimut ujaasinermut atatillugu saaffiginnittut amerlavallaanngitsut
18-nik ukiulimmut Palu Brobergimut ujaasinermut atatillugu Qaasuitsumi politiinut saaffiginnittut amerlavallaanngillat. Palu Broberg decembarip sisamaani kingullermik takuneqarpoq
18-nik ukiulimmut Palu Brobergimut ujaasineq suli angusaqarfiunngilaq. Qeqertarsuarmi angerlasimaffimminit animmalli decembarip sisamaanili suli takuneqaqqinngilaq.
Politiit suli ujaaraat.
- Qaasuitsumi politiini pisortaagallartoq, Kasper Berthelsen, Palu Brobergip nassaarineqarsinnaanera qanoq ilimanartigaa?
- Nassaarinissaa ilimanarpallaanngilaq. Ilaqutai umiatsiaaqqamik ujaasipput, nunami ujaasipput kiisalu aamma snescooterinik aamma ujaasillutik suli angusaqarfiunngitsumik. Qatserisartut naalagaat aamma ujaaseqataagaluarpoq, aamma angusaqarfiunngitsumik.
- Palu Brobergip periarfeerunnera pillugu saaffiginnittoqartarpa?
- Saaffiginnittut amerlavallaanngillat. Saaffiginnittut nassuiaataat malillugit misissuisoqartaraluarpoq iluatsiffiunngitsumik.
- Angerlarsimaffimminit anigami qanoq issimava?
- Paasisavut naapertorlugit Palu Broberg aliasussimanngilaq, Kasper Berthelsen akivoq. Palu Brobergip sumiissimasinnaanera pillugu inuit paasissutissaatillit politiinut saaffiginninnissaat suli kajumissaarutigineqarpoq.
18-nik ukiulik Palu Broberg 180 centimeterinik angissuseqarpoq qernertumik tuluujuaraqarluni, taartunik qarleqarluni aappalaartumillu Nike-nik skooqarluni, angerlarsimaffimminnillu anigami qaatigooqarsimanngilaq mobileqarsimananilu.