Partimit tunuartoq aserorteriffigineqartoq
Pingasunngornermi ullaakkut Inatsisartuni ilaasortap Knud Fleischer Ilulissat kusanaatsumik takusassaqartinneqarpoq
Ingasaq akuerineqarsinnaananilu. Politiit suliassaat.
Qularnanngitsumik oqaatsit tamakku ilaatigut eqqarsaatigisimassavai politikkimik suliallip Knud Fleischerip pingasunngornermi ullaakkut Ilulissani biilini takugamiuk. Pinerluttup pinerluttulluunniit arlallit unnuap ingerlanerani biilia qalipaammik sungaartumik seqqitsarneqarsimavoq assakaasui marluk qaarlugit taamatullu biilip iluanut spritimik kueraasoqarluni.
- Nuanniitsorujussuuvoq. Kattusseqatigiit Partiiannit aninerma kingorna ajortisaarneqarneq misigaara. Taamaattulli unitsissinnaanngilaannga, Atassut sinnerlugu Inatsisartunut qinigassanngortissaanga, Knud Fleischer knr.gl.'imut oqarpoq.
Suliaq maanna politiinut suliassanngortinneqarpoq taakkua paasiniaaneq aallartippaat. Politiit suli naluaat aserorterineq politikkimik tunngaveqarnersoq, knr.gl allappoq.