Piniarneq
Peqatigiiffik appanik ernumassuteqartoq
Peqatigiiffik Timmiaq, appat piniarneqaannarnissaannut naalakkersuisup siunnersuuteqarneranut pakatsivoq. Peqatigiiffik maanna Naalakkersuisut siulittaasuannut Kim Kielsenimut aammasumik allagaqarpoq
Ukiut marluk matuma siorna Pinngortitaleriffiup, Kalaallit Nunaanni appat ikilinikuungaarmata, appanniarneq ukiuni qulini unitsinneqartariaqartoq imaluunniit ukiakkut qaammat ataasiinnaq piniartoqartariaqartoq nalilerpaa.
Tamatuma kingorna peqatigiiffik 'Timmiaq', timmissanik illersuinissamik siunertaqartoq, Namminersorlutik Oqartussat Pinngortitaleriffiup siunnersuutaa qanoq piviusunngortinniarneraa pissangalluni utaqqisimavaa.
Kisianni piniarnermut aalisarnermullu naalakkersuisoq, Karl-Kristian Kruse (S), ukiakkut qaammatini marlunni piniartarnerup attatiinnarneqarnissaannut aamma upernaakkut qaammat ataaseq piniarsinnaaneq ammaanneqaqqinnissaanut siunnersuuteqarmat peqatigiiffik pakatsivoq.
Atuaruk: Ilisimatuut: Taamaattumik appat nungulerput
Ukiualuit qaangiuppata nunguissasut
Timmiaq siunnersuummut assut pakatsivoq, maannalu Naalakkersuisut siulittaasuannut, Kim Kielsenimut (S) ammasumik allagaqarluni.
Qeqertarsuup Tunuani Ritenbekimi appaqarfimmi, siornatigut 45.000-nik timmiaqarsimasumi maanna 1.000-t ataallugit timmiaqalersimasoq, peqatigiiffiup tikkuarpaa.
- Appaqarfik iliuuseqarfigineqanngippat ukiualuit qaangiuppata timmiaarunnissaa ilimanartorujussuuvoq. Taamaalilluni timmiaqarfiusimasut 20 minnerusut annerusulluunnit assigalugit nunguissaaq, peqatigiiffik Kim Kielsenimut allappoq.
Atuaruk: Appat eqqissisitaalluinnarnissaat biologit inassutigaat
Iluareqqusaartut qatsukkaat
Peqatigiiffiup ilanngullugu ilisimatitsissutigaa, 1930-ikkut ingerlaneranni peqassutsimik misissuinernit siullernit, Kalaallit Nunaat appanik millionit affaannik annaasaqareertoq.
- Eqqarsaatigilaaruk, Kalaallit Nunaat piniarnerup aamma takornariaqarnerup tungaatigut uungaannaq isigaluni ingerlatsisoqarneratigut pisuussuterujussuarmik annaasaqartoq, peqatigiiffik erseqqissaavoq.
- Pinngortitaleriffik ukiut qulikkaat qaangiuttut pilersinneqarmat, amerlasuujulluta Nunatsinni pinngortitamik ingerlatsineq piviusut tunngavigalugit, misigissutsit aamma iluareqqusaarnernerit aallaaviginagit aalajangiivigineqartarnissaat qilanaarisimagaluarparput.
- Ajoraluartumik pakatsisinneqartuaannarpugut. Taamaammat tamanna ajunaarneq pinngitsoortinniarlugu ilinnut silatusaaqqusinerput amerlasuut sinnerlugit oqariartuuteqartugut qularinngilarput, peqatigiiffil Timmiaq allappoq.