Piaarinaatsoornikkut eqqakkanut nersussuanngortoq
Ilisimaviuk eqqakkanut nersussuaq, eqqakkanik katersinermut ilisarnaatinngorsimasoq, eqqakkanut nersussuassatut piaqqiarineqarsimanngimmat?
Nersussuaq sungaartoq aappaluaartoq qernertunik milalik ilisimaneqarluartoq, piaarinaatsoornikkut eqqakkanut nersussuanngorsimavoq. Nersussuaq aallaqqaammut nunarsuaq tamakkerlugu aaqqissuussinermut, Cow Parademut ilaagaluarpoq, tamannalu pilluni Københavnimi 2007-mi juunimit septembarimut.
Tamatumani nersussuit 42-t glasfiberimit sanaat pinnersarneqarput, Cow Parademilu eqqumiitsuliornermut kulturimullu pikialaartitsinermut ilaatillugit saqqummersinneqarlutik.
Tamatuma kingorna nersussuit tamarmik akitsorterunneqarput annerpaanillu akileerusuttunut tunineqarlutik. Akitsorterussinermit iluanaarutit peqatigiiffimmut Meeqqat Ikiortigimmut tunniunneqarput, taakkulu 1,4 millionit koruuninnallutik.
Nalaatsornikkut Kalaallit Nunaaliartoq
KN Tagdækning A/S suliffeqarfiit ilagaat taamani nersussuarmik pisisoq. Taakku arlalinnik pisisimapput. Pisiarisatik taaguuserpaat #KNora, taanna suliffeqarfiup taaguutaata aamma Norap katinneraat, taassuma nagguigaa Nora Malkeko, Anders Andimi Andebymi innuttaasutut ilisimaneqartoq.
KN Tagdækning A/S ukiut ingerlanerini Nunatsinni qalialerinermik suliaqangaatsiartarpoq, taava februaarimi 2016-imi containerimik sananermi atortunik atortussanillu allanik Kalaallit Nunaannut nassitsisussanngoramik, #KNoramut inissaqarmat ilanngullugu nassiunneqarluni.
Meeqqat ikinngutaat eqqakkanut nersussuanngortoq
KN Tagdækningip suliassani aalajangersimasoq naammassimmagu, #KNora Kalaallit Nunaannik ima nuannarinnitsigilersimavoq, maaniiginnarsinnaanera akuerineqarluni. Taanna meeqqerivimmut atukkiunneqarpoq/tunniunneqarpoq, taamalu ukiuni arlalinni pilluarluni inuulluni, meeqqanut nuannaarutaaqisumik. Nersussuarli asannittunit attorneqartangaarami nungullarsimavoq taamalu kasiilerneqarluni ikuallaavimmullu ingerlateqqinneqarluni. Tassani nersussuaq angalatooq taanna nutarterneqarpoq, nutaamillu inuuneqalerluni eqqakkanik katersinermut ukiut tamaasa pisartumut, ukioq manna ingerlanneqaqqammersumut, aarnuaasatut iluanaartitsiniutitut atorneqartalerluni. Nersussuaq ikuallaaviup eqqaani, Qinngutsinnut aqqusernup eqqaani susoqarneranik nakkutiginneqqissaartoq takuneqarsinnaalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...