assigiinngisitsineq?
Pilersuisoq: Taamaattumik illoqarfiit ilaannaanni neqeroortoqartarpoq
Pisiniarfeqarfiup Pilersuisup atuisuminik immikkoortitsinerarneqarnini akuerinngilaa
Illoqarfiit sikusartumiinnersut sikusanngitsumiinnersulluunniit apeqqutaasarpoq Pilersuisup neqeroorutaanut ilaatinneqarnissaannut.
Nassuiaat Pilersuisumit saqqummiunneqarpoq Siumut sinnerlugu Inatsisartuni ilaasortaq Kristian Jeremiassen Pilersuisoq atuisuminik immikkoortitsinerarlugu nalunaareersoq, Paragraf 37 naapertorlugu apeqqummi tamanna erserpoq Kristian Jeremiassenip Naalakkersuisunut apeqqutigimmagu sooq Pilersuisup neqeroorutai illoqarfinni aalajangersimasuinnarni atuunnersut.
Atuaruk: K. Jeremiassen: Pilersuisoq immikkoortitsivoq
Maanna Pilersuisoq Naalakkersuisunit siulliulluni nassuiaavoq sooq neqeroorutit illoqarfinni aalajangersimasuinnarni atuunnersut.
- Issittumi inissisimasumi immakkut assartuinermi pissutsit aalajangiisuusarput neqeroorutinik aviisitigut ataatsimoortuni neqeroorutigineqartuni sumi tuniniaasoqartarsinnaanera. Nanortalik, Narsaq, Paamiut Aasiaallu ukiuunerani Royal Arctic Linemit tikinneqartarput, tassanilu uninngasuutit immikkut neqerooruteqarnermut naleqqussarneqarsinnaapput. Akerlianik Qasigiannguit, Qeqertarsuaq, Uummannaq, Upernavik Tasiilarlu ukiuunerani tikinneqarneq ajorput , taamaattumillu immikkut neqeroorutissanik uningaasuutinut sanilliullugit pilersorneqarsinnaasaratik. Illoqarfiilli taaneqartut kingulliit piffissami aalajangersimasumi uninngasuutitik aallaavigalugit namminneq aaqqitaminnik akikilliliinissamut periarfissaqarput, Pilersuisumi pisortaq Frederik Olsen oqarpoq.