Fyrværkeri-ekspert:
Pineqaatissinneqannginnissamik neriorsorsigit
Qummoroortartut tammarneqartut pillugit suliaq naammassiniarlugu, qummoroortartunut ilisimasallip periutsit nalinginnaanngitsut atorneqarnissaat kaammattuutigaa
Nuummi sumiiffimmi inissiat eqqaanni qummoroortartut 800 kiilut toqqorneqarsimanissaat ilimanarpat, taava qummoroortartunut ilisimasallip Karsten Nielsenip, inuit tassunga toqqorsusimasut pineqaatissinneqannginnissaannik neqeroorfigissagaluarpai.
- Qummoroortartut piaartumik nassaarinissaat pingaarnerusoq isumaqarpunga, taamaammat tillinniat pineqaatissinneqannginnissaannik neqeroorfigineqarsinnaagaluarput, taamaalilluni inissianit najugaqarfiusunit peerneqarsinnaassagaluarput, Danmarkimi qummoroortartunik nioqquteqartut peqatigiiffianni pisortaq, Karsten Nielsen oqarpoq.
Video takuuk: Ima ajortigisinnaavoq
Inissiat eqqaanni qaartoornissamut, ikuallattoornissamut imaluunniit pujoortoornissamut ulorianartorsiorneq annertuallaartoq, taassuma nalilerpaa.
Inuit pinerluuteqartut pineqaatissinneqannginnissamik neriorsorneqartut, politiit suliamik naammassinninnermik ikiuigunik, assersuutigalugu aallaasinik inerteqqutaasunik tunniussisut eqqartuunneqarneq ajorput.
Politiit attaveqarfigikkit, kisianni ...
Kisianni tamanna eqqarsaat politiinit itigartitsissutigineqarpoq.
- Inuit qummoroortartut pillugit paasissutissaateqarunik saaffiginninnissaat neriuutigaarput, politiineersoq Brian Thomsen oqarpoq, nangillunilu:
- Kisianni pinerluuteqarsimasut, assersuutigalugu tillinniartut imaluunniit qummoroortartunik unioqqutitsilluni toqqorsisut, soorunami pinerluuteqarnerminnut unnerluussaassapput, Nuummi politiineersoq Brian Thomsen oqarpoq.