Pisassat agguataarneri qanoq ippat
Karl Lyberth, Siumut paaserusuppaa aalisariutit angissusaat pisassallu agguataarneri qanoq innersut
- Umiatsiaararsorluni aalisartoq angallammik aalisariutitaaruni angallammut pisaaminut naleqquttunik aalisagartassinneqarsinnaava? Soorlu saarulliit qalerallillu eqqarsaatigalugit?
Taama nipeqarpoq Siumut sinnerlugu Inatsisartunut ilaasortap Karl Lyberthip paragraf 37 aqqutigalugu naalakkersuisunut apeqqutaa.
Apeqquteqaatini ima tunngavilersorlugu:
- Maniitsumi najugalik umiatsiaararsortoq angallammik aalisariummik pisaarniarluni sulissuteqartoq Namminersorlutik Oqartussanit nalunaarfigineqarsimavoq angallatitaassaguni angallatitaaminut naleqquttunik aalisagartassinneqarnissani naatsorsuutigisinnaassanngikkaa, soorlu saarullittassat eqqarsaatigalugit.
- Paaserusuppara taamatut nalunaaruteqarneq ilumut eqqortuunersoq, Karl Lyberth nassuiaavoq.
- Naatsorsuutigivara taamatut nalunaaruteqarneq kukkunerusimassasoq, ilisimasakka malillugit aalisarnermut inatsimmi taamatut aalajangersaasoqarnikuunngimmat, aamma isumaqarama umiatsiaararsorluni aalisartoq siumukarusuttoq tapersersorneqartariaqartoq periarfissinneqartariaqartariaqartorlu.