Pituffik
Pituffimmi kiffartuussinissamut isumaqatigiissummut nutaamut piffissaaruttoqalersoq
Danskit naalaakkersuisuisa Pituffik pillugu kiffartuussinissamut isumaqatigiissummik nutaamik isumaqatiginninniannginnerminni, Amerikamiut naalakkersuisui nutaat utaqqimaaqqaarpaat. Aaja Chemnitz Larsenip (IA) piffissaatillugu angumerinngitsoorneqarnissaa ernummatigaa
Kalaallit Nunaata aningaasaqarneranut Pittuffik qanoq pingaaruteqartigineranik Aaja Chemnitz Larsenip (IA) ministeriuneq Lars Løkke Rasmussen (V) eqqaasippaa.
Tamanna ippassaammat Folketingimi akunnermi apersuiffiusumi pivoq.
Atuaruk: Pituffik pillugu politikkikkut inaarutaasumik suliaq
Kiffartuussinermut isumaqatigiissutip nalinga Nunatta akileraarutitigut isertitaata 10 procentiatut amerlassuseqartoq, siornatigut naatsorneqareersimasoq taassuma unnersuussutigaa.
Tamanna tunngavigalugu Amerikamiut nunatsinniinneranni Kalaallit Nunaat aningaasatigut pisartagaqarnissaannik Inatsisartut aalajangiinerat, ministeriunerup naammassisinnaaneraa paaserusuppaa.
Atuaruk: Nunanut allanut ministeri: Attartornermut akiliuteqartitsisarnissaq piviusorsiortuunngilaq
Suliami tassani kalaallit danskillu soqutigisaat akerleriissuteqanngitsut, Lars Løkke Rasmussen (V) isumaqarpoq. Decembarimi qaffasissumik Washingtonimi arlaleriarluni ataatsimiittoqarsimaneranik taanna unnersuuteqarpoq.
Kisianni aatsaat Trumpip naalakkersuisui inissereerpata isumaqatigiinniartoqarsinnaanera tassani nalunaarutigineqarsimavoq.
Atuaruk: Kalaallit Nunaata Danmarkillu akornanni ajornartorsiorneq
Illersornissamut isumaqatigiissutip akornani erseqqissumik akerleriissuteqartoqartoq, Aaja Chemnitz Larsenip (IA) unnersuutigaa, taassuma kiffartuussinissamut isumaqatigiissut danskit/kalaallit ingerlatseqatigiiffiinut tunniunneqartarnissaa, tassami Excelis Services suliarinnittussanngortinneqarmat.
Danskit naalakkersuisui isumaqatigiissummik nutaamik Amerikamiut naalakkersuisuisa nutaat atuutilinnginnerini qulakkeerinninnissamut naammattumik iliuuseqarsimanersut, taassuma nangilluni apeqqutigaa.
Danskit naalakkersuisuisa eqqartuussinerit assigiinngitsut USA-mi aajalangerneqartut politikkikkut qaqinneqannginnerini utaqqeqqaarrtariaqarsimagaat, Lars Løkke Rasmussenip unnersuutigaa.
Excelisip kiffartuussinermut isumaqatigiissut oktobarip aallaqqaataani tigunnginnerani nutaamik isumaqatigiissuteqartoqarnissaa angumerineqarsinnaanngitsoq, Aaja Chemnitz Larsenip (IA) ernummatigaa.
Atuaruk: Vittu nersualaassava isornartorsiorneqassavaluunniit?
Taamaattumik danskit naalakkersuisuisa amerikamiut illersornissamut ministeriaqarfia ilungersorlutik isumaqatiginiartariaqaraat taanna isumaqarpoq.
- Ministeriuneq Naalagaaffeqatigiinnut ministeriuvoq, taamaattumillu danskit naalakkersuisuisa, Naalakkersuisut Inatsisartuni amerlanerussuteqartunit tapersersorneqartut qanimut suleqatigalugit, politikkikkut uteriisernissaat apeqqutaalluinnartoq isumaqarpunga, Aaja Chemnitz Larsen tusagassiuutinut nalunaarummi allappoq.