Polaroilsip nuunnissaa tapersersorpaa
Naalakkersuisut KNI-p nukissiornermut immikkoortortaata Sisimiunut nuunnissaa iluarisimaarpaat. Taamaalilluni piginneqatigiiffiup aningaasat millionilikkaat sipaassavaai, Kuupik Kleist oqarpoq.
KNI-p nukissornermiut immikkoortua Polaroil ukioq manna Sisimiunut suliffeqarfissuup sinnerata sumiiffianut nuussaaq.
Nuunnikkut ukiumu aningaasat milliuunilikkaat sipaarneqassapput, ingerlatseqatigiinnerup iluaqutissaanik pisunik kiisalu aqutsisut ulluinnarni qaninnerusumik oqaloqatigiissinnaanerisigut, KNI-mi aqutsitut Naalakkersuisunut tunngavilersuutaat naapertorlugit.
Piginneqatigiiffiup aningaasaqarnermi tatineqarsimasup pitsanngortinnissaa atorfissaqarteqimmagu Sisimiunut nuunnissaq pissusissamisoorpoq, naak tamanna Polaroilimi sulisut qulit suliffeerunnerannik kinguneraluartoq, Sisimiunut nooqataarusunnginnertik peqqutigalugu.
Taama Naalakkersuisut siulittaasuat Kuupik Kleist, IA, Inatsisartunut ilaasortamut Ruth Heilmannimut Siumumeersumut akissummini allappoq, taassuma kissaatigimmagu paasissallugu, sooq Polarpoil Sisimiunut nuussanersoq Maniitsormiunut mamianaqisumik, soorlu taama illoqarfimmi borgmesteriusimasoq allattoq.
ALLAASERISAQ ATUARUK: Ruth H. aalassassimaartoq
Taamaattorli Naalakkersuisut akuliunnianngillat.
– Piginnittut Namminersorlutik Oqartussat KNI A/S-imik piginnittut suliffeqarfiup ingerlatsinermini suut aalajangissanerai naalakkiutigisinnaanngilagut. Tamanna siulersuisut aqutsisullu suliassaraat, taamaaliornikkut naalakkersuinermik suliallit suliffeqarfiit ingerlatsinerannut akuliuttussaannginnerat anguneqarluni, Kuupik Kleistip akissummini naqissuserpaa.
– Naalakkersuisut isumaqarput sipaarniutit pisariaqartut ullumikkut nunatsinni aningaasameernitta nalaani ingerlanneqartariaqartut, ullumikkullu Sisimiut Maniitsorlu nutaami Qeqqata Kommuniani kommuneqatigiilermata kommunimi tamakkiisumik isertitassat ajorseriangaarnavianngillat, Kuupik Kleist Ruth Heilmannimut akissummini naggasiivoq.