Politiit: Angerlarsimaffinni eqqissiviilliorneqanngingajappoq
Politiit pissutsini nalinginnaasuni tallimanngornikkut imigassartortoqarsimatillugu angerlarsimaffinni eqqissiviilliornernut ornigunnerit ulapputigisarpaat. Nuummili imigassaq matuneqarmalli tamakkua ikileriangaatsiarsimapput
Imigassaq matuneqanngikkallarmat angerlarsimaffinni eqqissiviilliornerit aqqusinermilu perulluliornerit politiit suliaannut ilaalluinnartarsimapput, Nuummili imigassap matuneqarnerata kingorna politiit orniguttariaqalertarnerat qaqutigoornerulersimavoq.
- Tamanna nuannaajallannartorujussuuvoq. Angerlarsimaffinnimi eqqissiviilliortoqartillugu eqqissisaajartorluta orniguttariaqalertarnerput nukinnik atuiffigingaatsiartarparput, meerartaqarsinnaasarpummi, pigaartut pisortaat Julie Senderowitz Sermitsiaq.AG-mut oqarpoq.
Imigassamut attuumassutilimmik nalunaarutiginninnerit ikinnerulersimagaluartut illoqarfiit pingaarnersaanni politiit uninngaannanngillat.
Aqqusinikkut angallannermi suliarpassuit
- Aqqusinikkut angallannermi suliassanik naammattumik pingaartitsinnginnerput akuttunngitsumik tusartarparput. Kisianni ullup unnuallu kingulliup ingerlanerani suliassat aqqusinikkut angallannermi inatsisinik unioqqutitsinermut tunngasut arfineq-pingasut qulillu akornanniittut maluginiarsimavavut, pigaartut pisortaat paasissutissiivoq.
Nalinginnaasumik isumannaallisaanermi qitequtinik inersimasuni meeqqanilu atuinngitsoornerit, biilinik pissusissamisuunngitsumik inissiinerit, qulleq aappaluttuutillugu ingerlaannarnerit biilersinnaanermullu allagartaqarani biilernerit tamatumani pineqarput. Ataaseq biilersinnaanermut allagartamik arsaagaasimagaluarluni biilertoq aamma naammattoorneqarpoq.
- Biilertartunit aqquserngit inissaqarnerulersimanerat qularnanngitsumik malugineqarsimavoq. Kaammattorusuppakkali aqqusinikkut angallannermi inatsisinik malinneqqullugit ilaatigullu sukkassusissamut killiliussanik qaangiinaaveersaaqqullugit, pigaartut pisortaat oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...