Danmark
Politiit hashi 375 kiilu arsaarinnissutigaat
Københavnimi inatsisit tunngaviusut malillugit killisiuinermi inuit 13-it, 21-t aamma 59-it akornanni ukiullit, ulluni 26-ni tigummineqarallartussanngortinneqarput
København Byret-imi eqqartuussisup arfininngormat inatsisit malillugit killisiuinermi inuit 13-it, hashimik eqqussisimasutut tuniniaasimasutullu unnerluutigineqartut, tigummineqarallartussanngortippai.
Taamatut ritzau-mut paasissutissiivoq vicepolitiinspektør Knud Hvass.
Immikkoortillugit
Pineqartut 13-it tamarmik ulluni 26-ni parnaarunneqarput. Ulluni siullerni 13-ini immikkoortitaallutik.
Tigusarineqartut 21-it aamma 59-it akornanni ukioqarput.
– Ulluni siullerni 13-ini immikkoortinneqassapput, unnerluutigineqartut allanik sunniiniassanngimmata, vicepolitiinspektøri oqarpoq.
Unnerluutigineqartut ilaata ataatsip parnaarussaaneq eqqartuussivimmut qaffasinnerusumut ingerlateqqippaa.
Minnerpaamik 1,4 tonsi
Politiit naapertorlugit unnerluutigineqartut arlallit hashi minnerpaamik 1,4 tonsi eqqullugulu tuniniartarsimavaat.
MIsissuinernili hashi tamarmi nassaarineqarsimanngilaq. Hashili arsaarinnissutigineqartoq annikitsuunngilaq. Tassa 375 kiilu arsaarinnissutigineqarmat.
Aaqqissuussamik pinerlunneq
Inupilunnik immikkut paasiniaasartuni Task Force Østimi, ilaatigut inupilunni aaqqissussamik pinerlunnernik, assersuutigalugu ikiaroornartunik niuernermik, paasiniaasartuni, paasiniaanermi Knud Hvass pisortaavoq.
Paasiniaaneq ajornakusoortoq
Vicepolitiinspektør naapertorlugu pisumasumi matumani pinerlunniaqatigiit ilisimasaqarluinnartutut sulisimapput. Tamanna pissutigalugu politiit paasiniaanerat ajornakusoorsimavoq.
– Pineqarput qanoq isillutik attaveqaqatigiittarnerat. Aammalu pinerlunniaqatigiit suleriaasaat tamavimi, Knud Hvass siusinnerusukkut nassuiaanikuuvoq.
/ritzau/