kajumissaarut
Politiit imminut toquttarneq pillugu annerusumik iliuuseqartoqarnissaa ujartorpaat
- Uagut politiitut ajornartorsiut aaqqiiviginissaanut ilinniartitaanngilagut, politiini pisortaq Hans Herluf Pedersen oqarpoq
TV2-mi isiginnaagassiaq Station 2 aallakaatitassiani pingasunik Nunatsinni politiit sulinerat malinnaavigaat aammalu tv-liortartut tassunga atatillugu Nuuk, Aasiaat, Uummannaq aamma Upernavik immiussiniarlutik tikissimavaat.
Imminut toquttut amerlasuut
Aallakaatitassiat ilaanni imminut toquttartut amerlanerujussuat sammineqarpoq.
2014-mi inuit 43-rut imminut toqupput. Naak ukiuni kingullerni ikileriarsimagaluartut, Kalaallit Nunaat suli nunarsuarmi imminut toquttartut amerlanersaattut inissisimavoq.
Unnuakkut iliuuseqarneq
Arnaq imminut toqunniarsarisoq tv-liortut ilaatigut Nuummi politiit aqqulluttumi unnuakkut annanniarsarigaat malinnaavigaat.
Politiit ulluinnarni sulineranni imminut toqunnermut iliuuseqarneq initoorujussuusoq aallakaatitassiami takuneqarsinnaavoq.
Atuaruk: Imminut toquttarnerit aalajangeeriasaartarnerillu pillugit politiit mianersoqqusisut
- Pisinnaasatsinnik iliuuseqartarpugut, ajoraluartumilli imminut toqoriaqattaartartunik naammattuuisarpugut. Inunnut aggernitsinni misigikkajuttarparput, marloriarlutik, pingasoriarlutik aamma sisamariarlutik imminut toqoriarsimasunik naapitsineq. Naggataatigullu immaqa iluatsittarpoq. Tamannalu alianartorujussuuvoq, politiini pisortaq, Hans Herluf Pedersen, Station 2 naapertorlugu taama oqarpoq.
Iliuuseqarneq annertunerusoq
- Ajornartorsiut aaqqiiviginiassagaanni annertunerusumik iliuuseqartoqartariaqarpoq. Uagut politiitut ajornartorsiut aaqqiiviginissaanut ilinniartitaanngilagut. Taamaallaammi imminut toqunnissamik siorasaarisoq oqaloqatiginiarsariinnarsinnaavarput napparsimmavimmullu tunniullugu. Kisiannili aamma peqqinnissaqarfimmit iliuuseqartoqartariaqarpoq, tamaattoqartuaannarneranilli misigisimanngilanga, politiit pisortaat nangilluni taama oqarpoq.
Station 2 aamma politiit angallataannik Sisammik nunaqarfiit arlallit tikissimavaat, kommunefogedillu sulinerat malinnaavigalugu.
Assit takukkit: Imminut toquttarneq pillugu paqumigisanik allanngortitsisoq