Politiit pillugit maalaaruteqartarnermut oqartussaasuisa Tasiilami toqusoqarnera misissussavaat
Politiit pillugit Maalaaruteqartarfiup Attaviitsup Tasiilami suliaq misissussavaa, tassani politiit najuutsillugit arnaq inuusuttoq toquvoq.
Arfininngormat arnaq inuusuttoq Tasiilami toquvoq.
Politiit oqarnerat naapertorlugu arnaq imminut toquppoq, naak politiit oqaloqatigalugu tamanna pinngitsoortinniarsimagaluaraat. Pisup nalaani politiit najuummata, suliaq maanna misissorneqassaaq.
Politiit pillugit Maalaaruteqartarfik Attaviitsoq (Den Uafhængige Politiklagemyndighed) suliaq pillugu paasitinneqarsimasoq, Kalaallit Nunaanni Politiit ilisimatitsipput, oqartussaaffiullu nittartagaani aamma tamanna atuarneqarsinnaavoq.
Maalaaruteqartarfik paragrafimut 'inuup politiit suliaqarnerisa kingunerisaanik toqusimappat imaluunniit ajoquserujussuarsimappat, imaluunniit pineqartoq politiinit tigummineqarpat' innersuussilluni suliaq aallartinneqarpoq.
Misissuineq naammassineqarpat, Politiit pillugit maalaaruteqartarfik suliaq pillugu Københavnimi Naalagaaffiup eqqartuussissuserisuanut suliaq pillugu nassuiaammik nassiussissaaq.
Maalaaruteqartarfik 1. januar 2023 aallarnerfigalugu Kalaallit Nunaanni Politiinut sulianut tunngasunut suliarinninnissamik piginnaatitaalernerata kingorna siullermeerluni suliaqartussanngorpoq.