Politiit: Pinerluuteqartut 2016-imi amerleriarneranni pitsanngoriaat ataasiinnaavoq

Tamanna Kalaallit Nunaanni Politiit ukiumoortumik 2016-imi nalunaarusiaanni atuarneqarsinnaavoq, politiinut tamanna saniatigut ulapaarfiuvoq. Ingammik politimesterip Bjørn Tegner Bayip inunnut ulorianaatilimmik pinerluuteqartarneq ernumanartippaa.

Ukiuni arlalinni unnerluutiginnittarnerit ikiliartorsimasut taassuma naqissuserpaa, 2015-imilu aatsaat taama ikitsigipput. Taamaattumik siorna amerleriarnerat ataasiaannarluni amerleriaataanersoq imaluunniit ajorseriaqqittoqarneranik takussutissaanersoq ilisimaneqanngilaq.

Nakuusertoqarpallaartoq
Pinerluttulerinermut inatsimmik unioqqutitsisut sisamararterutaat immikkoortuni ukunaniipput:

• Nakuusernerit 780-it
• Pinngitsaaliilluni atoqateqarnerit 151-it
• Meeqqanik 15-it ataallugit ukiulinnik kanngutsaatsuliornerit 79-it
• Angerlarsimaffimmi meerartalinni eqqissiviilliornerit 331-it
• Angerlarsimaffinni meerartaqanngitsumi eqqissiviilliornerit 1916-it

- Pinerluttuliornerit amerlanersaat toqqissisimannginnermik pilersitsisarput. Kisianni inunnut ulorianaatilimmik pinerluuteqarneq tamatuma saniatigut inunnut kinguneqartitsinikkaarujussuuvoq. Timikkut anniarneq ersittoq kisimi pinnani, kisianni aamma tarnikkut annertuumik kinguneqartitsisinnaavoq, politimesteri ukiumut nalunaarusiap siulequtaani allappoq.

Kisitsisit Danmarkimut sanilliukkaanni, tamatuma iliuuseqarfigineqarnissaata salliunneqarnissaa pingaaruteqartoq taassuma naqissuserpaa.

- Kalaallit Nunaanni innuttaasut Danmarkimi innuttaasunut sanilliukkaanni 31/2-mik amerlanerusunik nakuusernermut unnerluutiginnittoqartarpoq, aamma kanngutsaatsuliornermut pinerluuteqartarnerit quleriaammik amerlanerupput, taamaattumik pinerluuteqarnernut tamakkununnga iliuuseqarneq salliutinneqartariaqarpoq.

Pitsanngoriaat ataaseq nuannaarutigigaa
Politimesterip ukiumut nalunaarusiap 36-nik qupperneqartup, kisitsiserpassuarnillu imaqartup pitsanngoriaataa ataaseq nuannaarutigaa.

Inuusuttut pinerluuteqartartut amerlerianngillat. Illuanik suliat unnerluutigineqartut inuusuttunillu pinerluutigineqartut ikiliartorusaarput, nalunaarusiami atuarneqarsinnaavoq.

- Pinaveersaartitsinermik suliaqarneq sunniuteqarnerata immaqa tamanna takussutissartaraa, tamannalu siunissami pinerluuteqartarnerup ineriartornerani ilorraap tungaanut ingerlanissamut neriuuteqarnermik tunngavissaqarpoq, politimesteri allappoq, taassumalu Kalaallit Nunaanni politiit ''qaffasissumik sulianik naammassinnittarnermut procenteqarnera'', tassani suliat tamarmik 61-iusut naammassineqartarneri nuannaarutigaa.