Politiit sulinerat malinnaaffigiuk
"Politistationen" TV3+-ip politiit malittaralugit aallakaatitassiaa KNR-ip takuteqattaassavaa. Immikkoortut siulliat Nuummi immiunneqarsimasoq maajip tallimaani takutinneqassaaq.
"Politistationen"-imik aallakaatitassiortut Nuummiissimapput politiit suliaat malinnaaffigiartorlugit. Tamanna immikkoortunut sisamanut killorneqarsimavoq. Nangeqattaartut sisamat sisamanngorpamiit sisamanngornerit tuliuttut pingasut KNR-ikkut aallakaatineqartassaaq.
- Immikkoortumi siullermi pinartoqartillugu akisussaasoq, Carl, tuaviinnaq mittarfiliartariaqalerpoq, islandimiut timmisartuat minnerliorsimmat. Susoqarsimaneranik paasiniaapallannissaq qanorlu iliuseqartoqarnissaa Carl-ip akisussaaffigaa. Politeeq qallunaaq, Michael, Nuummut tikisinneqarsimasoq qaaqquneqarpoq, imerniartarfiit ilaanni arnap niviarsiaraq ukiukitsoq nukiiserfigimmagu. Olava-lu oqarfigineqarpoq, ineqarfiit ilaanniit hash-imik tuniniaasoqartoq ornigukkamilu tassani najugalimmit puffassimaqisumit ammaanneqarluni.
’Politistationen’-ip immikkoortortaa siulleq sisamanngorpat maajip tallimaani nalunaaqutaq 22.00 KNR-ikkut isiginnaaruk. Allakaatitassat siullermik qallunaatuinnaq aallakaatinneqariarlutik kingusinnerusukkut kalaallisut allagartalersorlugit aallakaatinneqassapput.