Oqaatsit pillugit oqallinneq
Politikkeri inuusuttoq: Oqaatsit aporaaffigineqarunnaasspput
Kalaallisut oqalussinnaanngitsut ilinniartinniaraanni, peqqissaarillugu suliarineqartariaqarpoq, Siumup Inuusuttaani immikkoortoqarfiani siulittaasup tullia oqarpoq.
- Kalaallisut oqaluttuusugut aamma iluanaarutissaqarpugut, oqaatsimimmi atuisinnaasut amerlatsikkaangata, oqaatsit taakku iluaqutaasinnaanerat annertusisarmat.
Siumup Inuusuttaasa immikkoortortaqarfiai siulittaasup tullia, Suinni Johansen taama oqarpoq, oqaatsivulli amerlanerusunit atorneqalernissaa kissaatigaa.
Piviusunngortinneqassappallu, piaareersarluartoqarnissaa, taassuma erseqqissaatigaa.
Atuaruk: Akuereqqulluni ilungersorneq
Oqaatsit pillugit ilisimatusarneq
- Assersuutigalugu oqaatsivut qanoq ilikkaruminarnerusinnaanersut ilisimatusarfigineqartariaqarpoq. Meeqqat oqaatsit ulluinnarni atugaasuni tusartuakkaminnik ilikkajanerpaaffimminniittarnerat atorluarumallugu suliniutigineqartariaqarpoq nunatsinni peroriartortut tamarmik kalaallisut oqalussinnaanngortalernissaat anguniarlugu, taanna oqarpoq.
Taassuma neriuutigaa , Sverigemi atuuttoq aamma isumassarsiffigineqarsinnaasoq, nittartagaqarpormi svenskit oqaasii piorsarsimassusaallu pillugit ilinniarfissamik, pisortaniit aningaasalersorneqartumik, ingerlariaqqinnissamullu aaqqissuiffiutigisumik.
Akerleriinneq unitsikkusukkaa
Kalaallisut oqaasillit kaallisulli oqalussinnaanngitsut akerleriittuarnerat, Suinni Johansenip qatsuppaa.
- Aporaattuarneq sungiutiinnarnikuusarput allannguivigerusullugu siunnersuutigerusuppara naapeqatigiilluta ulluliissasugut qaqugu kalaallisut oqalussinnaanngoreersimaffissamik, assersuutigalugu 2035, ukioq manna inunngortut 18-nik ukioqalerpata, taanna oqarpoq nangillunilu:
- Taamaasillutami kalaallisut oqaluttuusugut paasissavarput piumasarput pimoorunneqartoq siunissami piviusunngorumaartoq, kalaallisullu oqalussinnaanngitsut piffissaqarluarlutik ilinniarsinnaanngussapput, taamaasillunilu aporaattoqarunnaassalluni, Suinni Johnsen taama oqarpoq.
Atuaruk: Partiit inuusuttaat sisamat: Tuluttut pikkorinnerulerta