Politikkerit 30-innaat Inatsisartut ataatsimiittarfiannukarput
Siumumi politikkeri Qarsoq Høegh-Dam ullumi nalunaaruteqareersoq, ileqquusutut politikkerit 31-t Hans Egedep illuani ullaakkut kaffisoqatigeereerlutik oqaluffimmut Inatsisartullu ataatsimiittarfiannut ingerlaaqatigiipput - 30-innaallutik.
Qarsoq Høegh-Damip naatsorsuutiginngisamik Inatsisartunit tunuarluni Facebookikkut nalunaaruteqarneratigut, ulloq allartillugu ingerlaaqatigiinneq naalagiaqatigiinnerlu pilersaarutit malillugit ingerlanneqarput.
Nalunaaqutaq aqqanernut inissititerineq aallartinneqarpoq, tassani Hans Enoksen siulittaasunngortinneqarluni aamma erneriit Iisaavaraq Inunnguarlu Petrussen erinarsuut Anorleqaaq tusarnaartitsillutik atorpaat.
Inatsisartut Qarsuup tunuarnera akuerigaat
Tamatuma kingorna Hans Enoksenip ilisimatitsissutigaa, Qarsoq Høegh-Damip Inatsisartunit tunuarniarluni kissaataa Inatsisartunit akuerineqarsimasoq.
Karl Tobiassen Qaarsuneersoq sinniisussatut aggersarneqarpoq, taanna Qinigaanerup misilinneqarnissaanut ataatsimiitsitaliamit misissuiffigineqarsimavoq, sulili Nuummut tikissimanani.
Tamatuma kingorna Qinigaanerup misilinneqarnissaanut ataatsimiitsitaliap qinikkanik suliaqarnissaa pillugu oqaluuserisassaq aallartinneqartussanngormat ataatsimiinneq tamanut matuneqarpoq.
Polikkeritut qinigaarlaat Hans Egedep illuani ullaakkorsioqatigiittoqareermat assingi takukkit, aamma ingerlaaqatigiinneranni naalagiarnerannilu assit.