Politikkerit: Pituffik pillugu suliami danskit naalakkersuisui piareersimasimanngillat

Pituffimmi kiffartuussinissamut isumaqatigiissutip suliarineqarnerani danskit naalakkersuisui piareersimasimanngillat. Kiffartuussinissamik isumaqatigiissut amerikarmiut oqartussaqarfiannit tiguneqarpoq 2013-mi, tamannalu pitsaanerusumik suliarineqarsimasussaagaluarpoq.

Taamatut isumaqatigiissuteqartoqarnerata pissutigisaanik kalaallit sulisut siunissami atorneqaannassanersut nalornissutigineqalerpoq. Sulisummi akileraarutaat Kalaallit Nunaata aningaasaqarneranut iluaqutaasarput.

Folketingimi ilaasortat arlaqartut pingasunngornermi taamatut isumaqarput. Taanna pillugu danskit nunanut allanut ministeriat Martin Lidegaard apeqqarissaarfigineqarpoq.

Amerikarmiut suliffeqarfiutaata Exelis Servicesip Danmarkimi piginneqatigiiffia Vectrusip kiffartuussinissamut isumaqatigiissuteqalernera pillugu ministeri apeqqarissaarneqarpoq.

Danmarki aamma USA isumaqatigiissuteqarnikuugaluarput Danmarkip Kalaallit Nunaatalu suliffeqarfiannik kiffartuussinissamut isumaqatigiittoqassasoq, tassani kalaallit sulisorineqartut ataavartinneqarnissaat siunnertarineqaraluarmat.

Enhedslisten aamma IA
- USA-mik isumaqatigiissuteqarneq decembarimi 2013-mi danskit naalakkersuisuinit kukkunerujussuuvoq. Annikitsuinnarmik iliuuseqarnikkut USA isumaqatigiissuteqarfigineqarpoq, Enhedslistenip Kalaallit Nunaat pillugu oqaaseqartartua, Finn Sørensen, oqarpoq.

Inuit Ataqatigiinnit Folketingimi ilaasortaq Johan Lund Olsen oqaluttarfimmit oqarpoq Kalaallit Nunaat millioninik arlalinnik annaasaqarsinnaasoq.

Danmarkimut sanilliutissagaanni 240 milliarder koruuninik Kalaallit Nunaat annaasaqassasoq oqaatigaa.

Martin Lidegaardip oqaatigaa Danmarki EU-p inatsisaanik unioqqutitsisinnaaneq pinngitsoorniarlugu taamatut aalajangertoqartoq. Tassanimi Danmarkip kalaallit danskillu suliffissaqarniarnerat aaqqissuutissammagu.

- Isumaqatigiissut tunngavilersorluarneqarpoq EU-mi inatsisaasut malillugit isumaqatigiissusiortoqarneratigut. Suliffeqarfiimmi kiffartuussinissamik isumaqatigiissuteqarniarlutik ajorsartut eqqartuussivimmut tunniussisinnaapput. Tassuunatigut taartisiaqartitsinissat suliarineqarsinnaapput, Martin Lidegaard oqarpoq.

Isumaqatigiissummi kalaallit suliffissaqartinneqarnissaat ilaasoq oqaatigaa. Isumaqatigiissutip malinneqarnissaa naatsorsuutigalugu aamma oqaatigaa.

Dansk Folkeparti: USA isumaqatiginninniaqqiffigineqartariaqarpoq
Pituffimmi kiffartuussinissamik isumaqatigiissutip USA isumaqatiginninniaqqiffigineqaqqittariaqartoq Dansk Folkepartimit siunnersuutigineqarpoq. Tassani Danmarkimi suliffeqarfiit isumaqatigiissuteqaqqilernissaat anguneqassasoq siunnerfigineqarpoq.

Suliffeqarfiit kiffartuussinissamut isumaqatigiissummik tunineqanngitsut USA-p eqqartuussiviani maalaarutaat suliarineqassapput. USA-p Danmarkimi piginneqatigiiffiata isumaqatigiissuteqarfigineqarsimanera ilaatigut maalaarutigineqarpoq.

Maalaarutit qaammatip tulliani suliarineqassapput.

Siumumit Nick Nielsenip aamma Inuit Ataqatigiinnit Johan Lund Olsenip oqaaseqaataat talerpiata tungaani atuarneqarsinnaapput talerpiata tungaani