Puallaraluttuinnarpugut
Innuttaasut affaat pualavallaarput - pingaartumik arnat.
Nunani killerni allanisuulli pualavallaarneq nunatsinnissaaq ajornartorsiutinngorsimavoq, naallu naatitartornerulersimagaluarluta suli orsutorpallaarlutalu sukkutorpallaarpugut, tamannalu peqqissutsitsinnut ajoqutaalersimavoq.
Tamanna Satens Institut for Folkesundhedip misissuisimaneratigut qanittukkut saqqummiunneqartukkut erseqqissumik uppernarsarneqarpoq.
Misissuinermi inuit 2200-it peqataaffigisimasaanni takuneqarsinnaavoq, arnat angutininngaanniit pualanerulersimasut.
Misissuinikkut 1993-mi inuit peqqissusaannik misissuisimanerup malitsigisaatigut erserpoq, arnat pualasuut ukiut 15-it ingerlanerini 30 procentiniit marloriaatinngorlutik 60 procentinngorsimasut.
Arnat pualasuut marloriaatinnguinnarsimanngillat - aammali taakku pingajorarterutaat aamma pualavallaartuupput, tassa pualasoorsuullutik, imaappoq 30 sinnerlugu BMI-qarlutik, 18,5 aamma 25 akornanni BMI-qarneq nalinginnaasuulluni.
- Nukkiornannginnerusunik suliffeqalerneq aammalu orsoqarnerusunik sukkoqarnerusunillu nerisaqalerneq pualasuut amerliartupiloornerannut peqqutaapput, misissuisimasut Anni Brit Sternhagen Nielsen Nina Krogh Larsenilu allapput.
Pualasuut sukkornermik nappaateqalernissamut uumatilulernissamullu qaninnerusarput, misissuisimasullu aamma erseqqissaatigaat, pualasuut amerlanerulersimanerat aamma pualasuut pualanermik peqquteqartunik ataavartunik nappaateqalernissaannik kinguneqanngitsoornavianngitsoq.
Siunnersuutigaat oqimaassutsip, timip, nerisaqarnerup timigassartarnerullu akornanni pissutsit inuit ataasiakkaat amerlasuukkuutaallu pinaveersaartitsinikkut suliffigineqarsinnaanerat eqqarsaatigalugu misissueqqittoqassasoq.
Misissuinermit nalunaarusiaq talerpiatungaani aasinnaavat...
Sermitsiaq atuaruk - oqimaappallaarnerlutillu uuttorlugu....