Qamussuit akisuut iginneqarsimanerinut ingerlatsivik pasillerneqartoq

Illinernik sisortartarfissanillu piareersaasoqartarnissaanut maleruagassatigut tunngavissaqanngikkaluartoq, Qeqqata Kommuniani illiniliutissanik kommuni pissarsillunilu taakkunannga aserfallatsaaliisarnera Maniitsumi ileqquuvoq.

Kommuni illiniliuutinik pisillunilu aserfallatsaaliisarnera, 2005-imi aamma 1986-imi ingerlanneqartarsimasuni sisorarnermik nuannarisallik taamaammat sivisuumik nuannaarutigisarsimavaat.

Atuaruk: Qeqqata Kommuniani missingersuutit isumaqatigiissutaasut

Maannali maskiinat tamarmik atorsinnaajunnaarneranni Teknikkimut Avatangiisinullu ingerlatsiviup atortut akisuut ajoquteqanngitsut iginneqarsimanerannik pasilliissutit amerlasimangaarmata, suliaq pillugu kommunalbestyrelsimut ilisimatitsissuteqartoqartariaqarsimavoq.

- Formaticip pumpea atorsinnaasoq akisoqisorlu iginneqarsimanera pillugu tusaamasat, Teknikkimut Avatangiisinullu Immikkoortortap ilumuunnginnerarpai. Hydraulikpumpep siuliani eqqartorneqartoq, atorsinnaajunnaarnissaa tikillugu piffissap ingerlanerani sisamariarluni iluarsartuunneqarpoq, oqaatigineqareersutullu pumpemut kingoraartissanik pissarsisoqarsinnaasimanngilaq, Teknikkimut Avatangiisinullu Immikkoortortaq paasissutissiivoq.

Ingerlatsiviullu mekanikerit maskiinanik naliliisimasut aamma illersorpai.

Atuaruk: 2016-imut missingersuut: Qeqertarsuarmi majuartaat paaqqinnittarfinnilu akiliutit appasinerusut

- Ataatsimut isigalugu kommunip værkstediani sulisut tutsuiginartut maskinap atortuinik suli atorsinnaasunik igitsiunnanngillat, paasissutissiinermi atuarneqarsinnaavoq.

Iluarsaassineq ataaseq 100.000 koruuneqartoq
Qamussuit Formaticit ukiup 2005/2006-p nikinnerani pisiarineqartut suliamut tunuliaqutaapput. Iluarsartuunneqartariaqarneri patsisaalluni arlaleriarluni uninngatinneqartarnikuupput, suliaritikkaangatalu nalinginnaasumik pinerit tamaasa, ilaatigut 2009-mi aamma 2011-mi 100.000 koruunit sinnerlugit aningaasartuutigineqartarlutik. Iluarsaanneqarnerini ilaatigut hydraulikpumpi aamma planetgear nutaat pisiarineqarnikuupput.

Qamussuit 2012-imi aamma ajutooqqipput, kommunip taamaattumik suliffeqarfimmik Fromaticimik 2008-mi pisisimasoq attaveqarfigaa. Tassanilu ilisimatitsissutigineqarpoq taakkununnga kingoraartissanik sanaartortoqarunnaarsimasoq.

- Formaticit taakku modelit erngertumik sanaartorneqarunnaarput, taama nalunaaruteqartoqarpoq.

Teknikkimut Avatangiisinullu Immikkoortortap kingorna Kässbohrerip Norgemi agentianit, Antra, maskiina pisiariteriaraluarpaa.

Tamatuma saniatigut Antrap Teknikkimut Avatangiisinullu Immikkoortortamut paasissutissiissutiginikuuaa, Formaticimut pineqartumut kingoraartissanik pingaaruteqartunik amigaateqarneq patsisaalluni iluarsineqarsinnaassanngimmata isumagerusunnagit, soorluttaaq tunineqqinneqarnissaat isumagisinnaanagu, Teknikkimut Avatangiisinullu Immikkoortortaq nassuiaavoq.

Atortut elektriskit tunineqartut
Maskinap atortui atoqqissinnaasut, pingaartumik atortui elektriskit, qamussuit eqqaavissuarmut iginneqannginnerini piiarneqarput, taamaalilluni Teknikkimut Avatangiisinullu Immikkoortortaq elektronik- og miljøfarligt affald, RenoNord-imut tunisinermigut isertitaqalaarniassammat.

Angallatit motorillit igiinnariaallutik atorsinnaajunnaarnikut akisunerpaamik neqerooruteqartunut tuniniarneqassappata, qularnanngitsumik illoqarfimmi sumiiffimmi allami atorsinnaanatik igitassaannartut uninngasuutigineqarnissaat ilimanarluinnarpoq, tamannalu Qeqqata Kommuniata eqqagassalerinermi ileqqorisassaanik unioqqutitsinerussalluni, Teknikkimut Avatangiisinullu Immikkoortortaq allappoq.

Nunarsuarmi kingulliit
Qamussuit Pisten Bullyp motoria, Teknikkimut ingerlatsiviup 1986-imi pisiarinikuuaa, 2014/2015-ip ukiuunerani ingerlaqqissinnaajunnaarlutik ajutoorput. Maskinamut kingoraartissat, matumani motori nutaaq ilanngullugu pissarsiassaajunnaarsimapput, taamaattumillu iluarseqqinneqarsinnaasimanatik.

Taamaattumik Teknikkimut Avatangiisinullu Immikkoortortap aalajangerpaa, qamussuit tuniniarneqassanngitsut. Ilutigalugu oqaatigineqassaaq, Pisten Bullyt taakku 2015-imi ajutuuinnissaat tikillugu, kisiartaalluni nunarsuami ingerlatigineqarsimammat, ingerlatsivik nassuiaavoq.

Qamussuit atorunnaarsinneqartut maanna eqqaavissuarmi illoqarfiup eqqagaasa akornanni uninngatinneqassapput.