Qaqortoq
Qaqortumi IA nutaamik siulittaasortaarpoq
Inuit Ataqatigiit Kujataani illoqarfimmi immikkoortortaqarfiat qanittukkut ataatsimeersuaqqammerpoq, siulittaasumillu taasisoqarpoq
Ilinniarnertuunngorniarfimmi ilinniartitsisoq Eleamora Johansen Inuit Ataqatigiit Qaqortumi immikkoortortaqarfiani, QIA, siulittaasunngorpoq.
Ataatsimeersuarnermi siulersuisut isumaqatigiillutik aalajangiuppaat, urani pillugu oqallinnermi innuttaasut pitsaanerusumik paasissutissinneqartarnissaat.
- Oqallinneq aap naaggaannarmut killissimasoq itinerusumik ingerlanneqalertariaqarpoq sutigut tamatigut kingunerisinnaasaanik misissuinertalimmik qaammarsaanertalimmillu, immikkoortortaqarfik tusagassiuutinut nalunaarummi allappoq.
Atuaruk: Urani pillugu ICC Qaqortumi ataatsimiissaaq
Naleqqussarneq
QIA-p aamma Kalaallit Nunaata nammineernerunissaanik suliniuteqarniarpoq.
- Innuttaasut sapiissuseqarnerusariaqarput. Tamanna ilaatigut inuussutissarsiutit, inuit atugaat, ilinniartitaanerit pillugit ammasumik qaammarsaaviusunik oqallitsitsisarnikkut QIA-miit suleqataaffigineqassaaq, immikkoortortaqarfik tusagassiuutinut nalunaarummi erseqqissaavoq.
QIA-mi siulersuisunut ilaasortat nutaat:
- Siulittaasoq: Eleonora Johansen
- Allatsi: Kelly Berthelsen
- Aningaaserisoq: Thorvald Bernhardtsen
- siulersuisunut ilaasortat ilaasortat: Jens Ole Geisler, Otto Stach
- Inuusuttut sinniisuat: Lars Salik Henningsen
-
Sinniisut: Erika N. Baadh, Elias Efraimsen
Atuaruk: Kujallermi suleqatigiinnermit Inuit Ataqatigiit anipput