silarluk
Qasigiannguani anorersuarpoq
Kujasik kangisimmik atorersuaq aamma saqqarsarnermik taaneqartartoq pingasunngornerup ullaassaani Qasigiannguanut pitoraappoq
Qasigiannguani Juunarsip atuarfia pingasunngornermi ullaakkut nalunaarpoq anorersuarnera pissutigalugu atuarfik matoqqagallartoq. Kujasik kangisimmik anorersuaq saqqarsarneq illoqarfimmut pitoraassimavoq. Qujanartumik inunnik atortunillu ajoqusertoqarsimarpasinngilaq.
Misissueqqarnerit Asiap nittartagaa malillugu anorersuaq nalunaaqutaq 02.00 sakkortunerpaaffimminiippoq. Taamaasinerani anoraasuanerit sekund meterimut 48-mut uuttorneqarsimapput. Unnuap ingerlanerani anoraasuanerit sekund meterimut 30-ip missaani sakkortussuseqarput pingasunngornermilu ullaakkut sakkukilliimisimallutik
- Qujanartumik inunnik atortunillu ajoqusertoqarsimarpasinngilaq, Qasiannguani politeeqarfimmi ulluinnarni aqutsisoq Abia Ottosen Sermitsiaq.AG-mut oqarpoq.
DMIp ilimasaarutaa malillugu Qasigiannguani anori ullup ingerlanerani sakkukilliartuinnartussaavoq sisamanngornermi ualikkut qatsungalluinnalerumaarluni.