Qeqertarsuup Tunuani qulimiguulimmik ataatsimik ilasisoqarpoq
Qulimiguulik januaarimi aamma februaarimilu timmisartuussissaaq
Qeqertarsuup Tunuani qulimiguulik ilassutaasoq AS350 2020-mi januaarimi aamma februaarimi timmisartuussissaaq.
Tamanna Namminersorlutik Oqartussanit tusagassiutinut nalunaarutigineqarpoq. Qulimiguulimmik ilassuteqartoqarneratigut ornitassanut arlalinnut aallartartut ilaneqarsinnaalersut ilisimatitsissutigineqarpoq.
- 2020-mut Aningaasanut Inatsisip akuersissutigineqarneratigut Naalakkersuisut kiffartuussinermut isumaqatigiissutini pitsannguinernik arlalinnik qulakkeerisinnaalerput. Nuannaarutigaara pitsannguinerit Qeqertarsuup Tunuani innuttaasunut iluaqutaasinnaammata, attaveqaqatigiinnermut naalakkersuisoq Karl Frederik Danielsen (S) tusagassiutinut nalunaarummi oqarpoq.
Qulimiguulik ilassutaasoq peqqutaalluni angallannermut pilersaarut eqaannerulersinneqarsoq nalunaarutigineqarpoq, taamaalilluni ilaasut ukiup aallartinnerani sila peqqutigalugu kinguaattoortut sukkanerusumik ornitassaminnut apuunneqarsinnaasimapput.