Qimusseriarsuarmi umiatsiaq ujaarineqartoq
Kangilinnguani Sakkutooqarfiup angutit marluk Savissiviup Kullorsuullu akornanniittut ujaaraat
Sakkutuut umiarsuaat Knud Rasmussen, sakkutuut timmisartuat "challengeren" aamma politiit angallataat Sisak II tamarmik ujaasinermi peqataatinneqarput. Taama Kangilinnguani sakkutooqarfiup nittartagaani allassimasoqarpoq.
Oktobarip arfineq-aappaanni Kangilinnguani sakkutooqarfik umiatsiaaqqamik angutinik marlunnik issimasulimmik ujaasilluni aallartippoq. Umiatsiaq Savissivimmit Kullorsualiarluni oktobarip sisamaanni 2011 aallarpoq, sulilu naatsorsuutigineqartutut apuuffissaminut anngussimanani.
Savalimmiuni sakkutooqarfik umiatsiaq tammaasaq pillugu Upernavimmit politiinit attavigineqarput.
Politiit isumaqatigineqarput timmisartoq "challengeren" ujaasinermut ilaatinneqassasoq, sakkutuut umiarsuaat alapernaarsuut Knud Rasmussen aamma politiillu angallataat Sisak II ujaaseqataassasut, Kangilinnguani sakkutooqarfik nalunaarpoq.
Challengerip tallimanngorneq oktobarip arfineq-aappaat Qimusseriarsuaq kaaviiaaraluarpaat kinguneqanngitsumik.
Arfininngorneq arfineq-pingasuat ujaasineq nanginneqarpoq. Knud Rasmussen aamma Sisak II ujaaseqataassallutik sumiiffimmut anngupput. Umiarsuit Kullorsuarmit Savissiup tungaanut sinerissap sinaa ujaasiffigissavaat.
Ilaqutaasut Upernavimmiittut ujaasineq pillugu kalerrinneqareerput.
Kangilinnguani sakkutooqarfimmit innuttaasut qinnuigaat angutit umiatsiaararsortut marluk pillugit paasissutissanik peqarunik kalerriutigeqqullugit.
Angutit marluk pillugit inuit ilisimasallit Upernavimmi politiinut attaveqaqquneqarput tlf.: 590222 imaluunniit Kangilinnguani sakkutooqarfimmut tlf.: 691911.