qinersineq
Qineqqusaarnermi TV-kut toqqaannartumik aallakaatinneqartumi kingullermi oqallittoqarluarpoq
Qinersisartunik ataatsimiititsineq TV-kut aallaatinneqartoq kingulleq sapaatiummat ualikkut ingerlanneqarpoq. Kommuneqarfik Sermersuup aningaasaqarnikkut ajornartorsiornerujussua sammineqarpoq
Sapaatiummat ualikkut nalunaaqutaq 14 qinersisartunik ataatsimiititsineq KNR-TV-kut toqqaannartumik aallakaatinneqartoq kingulleq ingerlanneqarpoq. Nuummi gymnasiami inersuaq inunnik, partiinik assigiinngitsunik tapersersuisunik, ulikkaavippoq.
Ataatsimiititsinermi aallaqqaammut naligiissaarinermik aaqqissuussineq kommunillu kattunnerat oqaluuserineqarput, tamatumani Kommuneqarfik Sermersooq sammineqarluni.
Nivi Olsen, Demokraatineersoq, isumaqarpoq apeqqummi tamatumani Kalaallit Nunaat avissimasoq.
– Kalaallit Nunaanni ingerlatsiviit mikisut namminersortut amerlanerusunik periarfissaqartariaqarput. Pisortat tamatigut tapiissuteqartarfittut isiginiassanngilavut, taanna oqarpoq.
Randi Broberg, Partii Inuit, isumaqarpoq pissaaneq innuttaasut tigoqquttariaqaraat:
– Taamaattumik kommuniusimasut pissaaneq tigoqquttariaqarpaat, kommunerujussuit sisamat qulaanit aalajangiisarunnaarlutik.
Sermersuup ajornartorsiutai
Inuit Ataqatigiit isumaqarput Naalakkersuisuusimasunit aqutsinerlunnerujussuaq pissutaalluni tamatumani Kalaallit Nunaat avissaartulersimasoq.
– Soorunami Kommuneqarfik Sermersuup Kalaallit Nunaata sinnera ikiussavaa, naligiissaareriaatsimullu uuttortaariaatsimik amigaateqarpugut, Sara Olsvig oqarpoq.
Partii Naleqqap pilersitsisuata siulittaasuatalu Hans Enoksenip isumaqatigaa naligiissaarinermik aaqqissuussineq Naalakkersuisunit aqunnerlunneqarsimasoq.
– Nuuk ingerlalluaraangat Itilleq aamma ingerlalluartarpoq. Tamanna malugisarparput, Enoksen oqarpoq.
Taamaattumik uggornarpoq kommunit oqaloqatigiinnerat ullumi aserorneqarsimammat, taanna tikkuaavoq.
Pasilliinerit Siumup tunuartippai
Siumumeersoq Doris Jakobsen isumaqarpoq Kommuneqarfik Sermersuup aqunnerlunneqarneranut Naalakkersuisut pisuutissallugit akikippallaartoq.
– Sermersuup aningaasaqarnikkut ajornartorsiornera kommunit akisussaaffigaat, Naalakkersuisuunngitsut, taanna oqarpoq.
Oqallinnerup qallunaatoortaa nalunaaqutaq 16.00 aallartippoq KNR2-milu toqqaannartumik nutserneqartumik.
Sapaatiummat Nuummi GU-mi qinersisartunik ataatsimiititsinermit assinik Sermitsiaq.AG ataasinngorpat ilanngussissaaq.