Politiit mianersoqqusipput:
Qummoroortaatit tillinneqartut qaarsinnaasut
Qummoroortaatit 1,5 tonsit Qinngorpumi containerimit tillinneqarput
Nuummi unnuaq containerip paarnaarsarfia aserorlugu Qinngorpumi qaartartuusiviup eqqaani imaarneqarmat, qummoroortaatit 1,5 tonsinit oqinnerunngitsut tillinneqarput.
- Qumoroortartut taammak annertutigisut isumannartumik pineqanngippata qaartoornermik, ikuallannermilluunniit annertuummik kinguneqartitsisinnaapput, politiit tusagassiuutinut nalunaarummi maanna ilisimatitsipput.
Atuaruk: Nuummi qummoroortaaterpassuarnik tillinniartoqartoq
Qummoroortartut karsini 100-ni poortoqqasimapput, politiillu ilimagaat biilit angisuut atorlugit assartorneqarsimanissaat.
- Qatserisartut ittuata erseqqissaatigaa, qummoroortartut annertussusaat eqqarsaatigalugu annertuumik sillimaniarnikkut ulorianartorsiortitsisinnaasut isumannartumik toqqoqqanngippata, politiineersoq Søren Bendtsen ilisimatitsivoq.
Qummoroortartut katersortarfimmi tuniniarneqartussaagaluarput, tuniniaanermilu sinneqartoorutaasut Nuummi pitsaanerusumik katersortarfimmut nutaamut atorneqartussaagaluarlutik, ullumi piginnittut ilaat, Vivi Schmidt, Sermitsiaq.AG-mut taama oqaluttuarpoq.
Politiit tillinniarneq pillugu paasissutissanik ujartuipput, inuillu oqarasuuammut 70 14 48-mut attaveqaqquneqarput.