saammaasseqatigiinneq
Saammaateqatigiinnissamut Isumalioqatigiissitami ilaasortaasut pissusissamisoorput
Karla Jessen Williamson Saammaateqatigiinnissamut Isumalioqatigiissitami ataqqinaatitut ilaasortaavoq, taamaattumillu Isumalioqatigiissitami ilaasortarineqartut pissusissamisut inissisimallutik
Saammaasseqatigiinnissamut Isumalioqatigiissitat pilersineqaqqammertut inuttaasa suiaassusiisa agguataarnerat Anda Uldumip KNR-ip Radioaviisiani Naalakkersuisut isornartorsiorpai.
Namminersorlutik Oqartussanit erseqqissaatigineqarpoq Karla Jessen Williamson, antropologimi doktori, Saammaateqatigiinnissamut Isumalioqatigiissitami ataqqinaatitut ilaasortaasoq. Ataqqinaammik ilaasortaq akissarsiaqartinneqassanngilaq, aamma ataqqinaatitut ilaasortaanermigut, isumalioqatigiissitami ilaasortatut pisussaaffeqassanngilaq akisussaaffeqarnanilu, kisianni ilisimasani misilittakkanilu tunngavigalugit ataatsimiinnernut ilassuteqartassaaq, nassuiaatigineqarpoq.
Nalunaarutigineqareersutut isumalioqatigiissitami ilaasortat tassaapput:
- Klaus Georg Hansen, etnografiimi cand. mag.-iusoq,
- Amalia Lynge Pedersen, cand. psych.-iusoq,
- Jens Heinrich, kulturikkut oqaluttuarisaanermi Ph.d.-usoq,
- Aviâja Egede Lynge, cand. scient.-iusoq, aamma
- Ida Mathiassen, ilinniartitsisoq nalinginnaasumillu perorsaasarnermi cand. scient.-iusoq.
Taamaasilluni Isumalioqatigiissitami ilaasortaasuni arnat pingasuupput angutillu marluullutik.