Sapaatip-akunnera tuparujussuarfiullunilu ernumaffiusoq
Ilulissani innuttaasorpassuit eqqissiallaammipput politiit arfininngornermi eqqartuussisoqarfimmi angut arnarlu angummik toqutsisoqarsimaneranut atatillugu parnaarussassanngortimmatigit; angutip timaa aggorneqarsimasoq sapaatip-akunnera tamanna sioqqullugu ikuallaavimmi nassaarineqarpoq.
- Inuppassuit toqqissisimasimanngillat. Toqutsisumik akornatsinniittoqarnersoq ilisimanngilarput. Imaluunniit toqutaasoq kinaanersoq. Ilisarisimasannik sivisuumik takusimanngisannik takugaangama oqiliallarujussuartarnera arlaleriarlunga misigaara. Arraa taava toqutaasoq taannaasimanngilaq.
Taama Ilulissani innuttaasoq, kinaassutsiminik isertuussiumasoq, oqaluttuarpoq, taassumali Ilulissani innuttaasut 4800-t ilarpassuisa misigissutsit erloqinartut ernumanerillu pigisimasaat, Ikuallaavimmi sulisup arfininngornerup siuliani timip ilaanik, eqqakkat akornanni inuusap ilaanut assingusumik, nassaarnerata kingorna atuussimasut, eqqoqqissaartumik oqaasertalerunarpai. Politiit kalerrinneqarput sapaatip-akunneranilu ataatsimi paasiniaasoqareersorlu – ilaatigut immikkut ilisimasallit Danmarkimeersut ikiortigalugit – angut arnarlu arfininngormat tigusarineqarput toqutsinermullu amiilaarnaartumut unnerluutigineqarlutik.
Aviisi AG taama allappoq.
AG-p toqutaasup tigummigallarneqartullu aqqi ilisimavai.
Toqutsisoqarsimaneranik suliaq nalinginnaanngitsumik amiilaajummernartuuvoq. Toqutsisup tupinnaannartumik soqutigittaaqaluni timi, maannamut qanoq ililluni ilisimaneqanngitsumik Ikuallaavimmut assartorneqannginnerani, aggorsimavaa. Ikuallaavimmi sulisoq misissoqqissaarsimanngikkaluarpat, toqutsisoq ajortuliami isertuussiniarnermini iluatsitsisimassagaluarpoq.
Aviisimi AG-mi atuarnerusinnaavutit: