Sara Olsvig: Inuit arnat nukittuut eqqaamasigit
ICC-p nunat tamalaat akornanni siulittaasua, Sara Olsvig, ulluni makkunani New Yorkimiippoq FN-ip Arnat pillugit Ataatsimiititaliarsuani ataatsimeeqataalluni. Nunat inoqqaavini arnat allannguisuupput, oqarpoq.
Naalagaaffiit Peqatigiinni Arnat pillugit Ataatsimiititaliarsuata 67-issaannik ataatsimeersuarnerani, ICC-p nunat tamalaat akornanni siulittaasua Sara Olsvig peqataavoq. Nunat inoqqaavini arnat aallartitaasut peqatigalugit ataatsimiippoq.
- Arnat nunat inoqqaavineersuusugut inuiaqatigiinni allannguisuuvugut, isumassuisuuvugut ataatsimoorlutalu inuiaqatigiinni sulianik annertuunik oqimaatsunillu kivitsisartuuvugut, Sara Olsvig nunarsuaq tamakkerlugu arnat ulluanni, 8. martsimi oqarpoq.
Arnat pillugit Ataatsimiititaliarsuup naligiissitaaneq arnallu inuiaqatigiinni sunniuteqarnerulersinnaanerat pillugu suliniuteqartarpoq.
ICC-p siulittaasuata tikkuarpaa ataatsimiinnermi peqataanermi nunatsinni arnat, nunat inoqqaavini arnatut naligiissitaanermik kisiartaallutik suliniuteqanngitsut ersarissisikkaa.
Ulloq malunnartissiuk
- Arnat Ulluannik pingaarutilimmik malunnartitsinissamik, arnallu siulivut tunngavimmik maanna tunngavigisatsinnik pilersitsisimasut tamatta ullup ingerlanerani eqqaassagivut kaammattuiumavunga. Inuit arnatai, nunasiaataasimanerup nalaani kingornalu, qaleriiaanik immikkoortitaanernik atugaqartarsimapput, inuiqatigiinni ataatsimoorussanik inunnillu ataasiakkaanik eqquisunik, Sara Olsvig oqarpoq.
Taassuma arnat, arnat ulluanni pilluaqqujumavai, oqariartuuteqarlunilu:
- Oqariartuut pingaarnerpaaq ullumikkut apuukkumasara tassaavoq nalaassimasavut oqimaakkaluarsimaqisut, siulitsinnit nukiit tunniunneqarsimasut tunngavigalugit suli tamaaniikkatta, sulilu angerlarsimaffivut, inuiaqatigiit inuiaallu siulersorlugit nukittuumik suliniartuaratta, ICC-p siulittaasua, Sara Olsvig naggasiivoq.