Savalimmiut corona tuniluuteqqilermat matuneqartoq
Savalimmiuni coronap tuniluunnera aqunneqarsinnaanngilaq. Oqartussanit inassutigineqarpoq, aaqqissuussat anginerit tamarmik sapaatip akunnerani ataatsimi unitsinneqassasut imaluunniit isiginnaartoqarani ingerlanneqassasut.
Nutaanik 43-nik tunillatsittoqarsimasoq sisamanngormat paasineqarpoq. Ulloq taanna sioqqullugu allat arfineq-pingasut tunillatsissimasut paasineqarsimalluni. taakkulu akornanni ataasiinnaanngitsoq kimit tunillatsissimanersoq ilisimaneqarani.
Oqartussat tuniluuttoqarnera aqussinnaaniarlugu taamaatitsiinnartoqarnissaanik inassuteqarput. Corona Tuluit Nunaanneersoq B.1.1.7 Savalimmiuni tuniluutilersimavoq.
- Oqartussanit taamaammat inassutigineqarpoq, pisortat namminersortullu inuppassuarnik peqataatitsisussamik aaqqissuussaat tamarmik kinguartinneqartariaqartut imaluunniit taamaatiinnarneqartariaqartut. Unnuakkut orninneqartartut aamma sapaatip akunnerata naanerani matuneqartariaqarput, lagmandip allaffianit tusagassiorfinnut nalunaaruteqarnermi oqaatigineqarpoq.
Nunanut allanut unamminissat unnukkullu kulturisiornissat eqqorneqartut
Savalimmiut inatsit aqqutigalugu matuneqanngillat, amerlanerilli oqartussat inassuteqaataannik malinninniarpasipput.
Savalimmiormiut Islandimiullu juunip sisamaani isikkamik arsarlutik unamminissaat isiginnaartoqarani ingerlanneqassaaq. 2500-nik isiginnaartoqarnissamut bilitsinik tuniniaasoqarnissaa neriorsuutigineqarsimagaluarpoq.
Taamatuttaaq Savalimmiuni arnat nunanut allanut unammisartut assammik arsarlutik sapaatip akunnerata naanerani unamminissaat isiginnaartorani ingerlanneqassaaq.
Taakkua saniatigut timersornikkut aaqqissuussat arlallit unitsiinnarneqarput.
Illoqarfiit pingaarnersaanni Tórshavnimi unnukkut kulturisiornissaq inuppassuarnik peqataaffigineqartartoq kinguartinneqarsimavoq.
Tager ingen chancer
Savalimmiuni siusinnerusukkut tuniluuttoqangaatsiarsimavoq, taamaattoq Savalimmiut nunanut allarpassuarnut sanilliullugu tuniluuttoqannginnerusimalluni. Piffissat annersaanni Savalimmiuni killeqanngitsumik ingerlaartoqarsinnaasimalluni. Ullormut misissuisarnermi nalinginnaasumik tunillatsissimasunik nutaanik paasisaqartoqarneq ajoraluarpoq.
Kingullertigut tuniluuttoqalernera maajip 23-ani aallartissimavoq. Aallaqqaammut tuniluuttoqarnera aqunneqarsinnaasoq nalunaarutigineqaraluarpoq. Tamannali eqqortuunngitsoq maanna paasinarsilluni.
Savalimmiormiut 39 procentii akiuussutissamik siullermeersumik kapitereersimapput, 23 procentiilu marloriarlutik kapitereersimallutik. Lagmandip Bárður á Steig Nielsenip oqaatigaa, innuttaasut tamarmik tunillanneqarsinnaajunnaarnissaat angutinnagu tuniluuttoqarnerata siaruaannissaa pinaveersaartinneqarniartoq.
- Sapaatip akunnerani matumani inuusuttut akiuussutissalertinnissamut periarfissinneqassapput. Sapaatip akunnialuini suli akiuussutissalersuinissaq pineqarpoq. Tamanna naammassigutsigu tuniluuttoqarnera unitsissavarput, taamaalillutalu aasamut killeqanngitsumik inuunerput ingerlatilersinnaassallutigu, Bárður á Steig Nielsen oqarpoq.