naalagaaffeqatigiinneq
Savalimmiut oqartussaaffik alla tigussavaa
Savalimmiuni naalakkersuisut oqartussaaffiup angisuup allap tigunissaa piareersarpaat. Inunnut, ilaqutariinnut kingornusisussaatitaanermullu oqartussaaffik 2018-imi tiguneqassaaq
Qallunaat naalakkersuisuinik isumaqatigiinniarnerit aasaru naammassineqassapput, tigusinissamillu siunnersuut juulip 29-anni lagtingimut saqqummiunneqassaaq. Ulloq taanna lagtingi ataatsimiilissaq, lagtingip ukiua nutaaq aallartillugu.
Lagtingi akuersissaaq
Oqartussaaffeqarfik angisuujuvoq taamaattumillu oqartussaaffik aatsaat 2018-imi aasakkut tiguneqarsinnaavoq, taamatut isumaqarpoq peqqissutsimut nunallu iluani pissutsinut ministeri Sirid Stenberg, Tjódveldi (Republikanerne).
Taamatut oqarpoq lagtingimi Jógvan á Lakjuni-mut, Folkeflokkenimeersumut, akissummini. Aammattaarli pingaartillugu oqaatigaa naggataatigut lagtingip tigusinissaq aalajangigassarigaa.
Piffissaq sivisooq atorlugu
Oqartussaaffik tiguneqarpat qallunaat inatsisaat Savalimmiuni atuutilissapput. Sirid Stenberg oqarpoq savalimmut inatsisaata piareernissaanut piffissaq sivisusinnaasoq.
– Savalimmiuni ilaqutariinnut tunngasunik inatsisiliornissaq qularnanngitsumik sivisussaaq, tamatumani ilaammata aappariinnermut inatsit, angajoqqaatut oqartussaassuseqarneq, kingornussisussaatitaaneq, naartuersinnermut inatsit inatsiserpassuillu allat, Sirid Stenberg oqarpoq.
Oqartussaaffiit allat
Tamanna peqatigalugu nunanut allanut tunngasunut ministerip Poul Michelsenip, Framsókn, nunat allamiunut nunallu silaannartaanut oqartussffiit tigunissaat sulissutigaa.
Suliamut pilersaarut naapertorlugu tigunissamut piareersarnerit ukioq manna aasaanerani sulinngiffeqalerneq sioqqullugu naammassineqarsimassapput.
Nunat allamiunut oqartussaaffiup tiguneqarnissaanik piareersarnerit ilutigalugu Schengenimi suleqatigiinneq pillugu Bruxellesimi oqartussaasut isumaqatigiinniarfigineqarput.
EU-mi pissutsit kinguartitsisinnaapput
Imaassinnaalluarpoq qimaasut agguataarnerannik EU-p unammilligassai nunallu ilaasa killeqarfimminnik nakkutilliilernerat pissutigalugu nunat allamiunut oqartussaaffiup tigunissaa kinguarsarneqarsinnaasoq.
Tamatuma saniatigut savalimmiut tunngaviusumik inatsisissaat naalakkersuisut suissutigaat, taannalu kingusinnerpaamik 2017-imi innuttaasunut taasissutigitinneqassaaq.