Savilersorluni arnamik toqutsineq: Tarnimikkut ataavartumik innarluutilinnut inissiisarfimmut piffissaligaanngitsumik inissinneqassaaq
Toqutsinermut tunngatillugu suliaq Qeqqata Eqqartuussiveqarfiata ullumi aalajangiiffigaa. Arnap inuusuttup arnaq utoqqasaaq februaarimi siorna toquppaa. Pineqaatissinneqartup pineqaatissinneqarnini akuerissanerlugu Nunattaluunniit Eqqartuussivianut suliassanngorteqqissanerlugu ulluni 14-ini eqqarsaatigeqqaassavaa.
Arnaq 26-inik ukiulik arnamut 55-inik ukiulimmut toqutsisimasutut, anaanaminullu nakuusersimasutut Qeqqata Eqqartuussiviani pingasunngormat pisuutinneqarpoq. Toqutsineq nakuusernerlu februaarip ulluisa arfineq-pingajuanni siorna pivoq.
Eqqartuussisoqarfimmi nakorsat siunnersuisoqatigiit oqaaseqaataat pissarsiarereerlugu arnaq qanoq pineqaatissinneqassanersoq eqqartuussivik ullumi aalajangerpoq.
Qallunaat Nunaanni inunnut innarluutilinnut, tarnimikkut ataavartumik innarluutilinnut inissiisarfimmut piffissaligaanngitsumik inissinneqassaaq.
Taarsiingaatsiassasoq
Arnaq 55-inik ukiulik siorna februaarimi qitimigut qungatsimigullu savimmik kapoorneqarnermi kingorna toquvoq. Kingorna arnap inuusuttup anaanani savimmik kapillugu nakuuserfigaa.
Tarnimikkut ataavartumik innarluutilinnut inissiisarfimmut inissinneqarnermi saniatigut katillugit 1,4 millionit koruuninik qimagaasunut taarsiissuteqassaaq, illerfiup angallanneqarneranut ilisaaneranullu aningaasartuutinut aamma akiliissalluni.
Arnap pineqaatissinneqarnini akuerissanerlugu Nunattaluunniit Eqqartuussivianut suliassanngortitseqqissanerluni ulluni 14-ini eqqarsarfeqassaaq.