Savissivimmi nannut marluk
Nannut marluk ippassaq 17-ip missaani nunaqarfimmi Savissivimmi upernaamut peqqumaataasivianut iserterput, imaalu tassaniittut nerilerlugit.
Nannut Savissivimmi innuttaasunut nannunut qaninngoornaveersaasimasunut qaasunniarnermik takutitaqanngillat, knr.gl allappoq.
Kisianni innuttaasut nannut nunaqarfimmit Qaanaap kujataani inissisimasumit qimaatissinnaannginnamikkit pisut toqqissisisimajunnaarutigalugit politiit kalerrissimavaat. Attaveqarnermut Avatangiisinullu Naalakkersuisoqarfiup isumannaallisaaneq eqqarsaatigalugu nannut toqunneqarnissaat qinnuteqaatigaa, tassanngaaniillu nannut toqunneqarnissaat akuersissutigineqarpoq.
Nannut neqaat nunaqarfimmi innuttaasunut agguaanneqarput. Amia kukiffai ilanngullugit, kigutai niaquatalu saarnga Kalaallit Nunaanni Namminersornerusut tigusarpaat.
Politiit oqaatigaat namminneq isumartik naapertorlugu Savissivimmi innuttaasut pisoq silatusaartumik pissusissamisoortumillu ingerlakkaat.