aatsitassat
Shell Issittumi uuliasiorniaqqilernera Greenpeacemit akerlilersorneqarpoq
Uuliasioqatigiiffiup nalunaarutigeqqammerpaa Alaskami aasaru uuliamik qillerisoqaqqinnissaa. Avatangiisinut illersuiniaqatigiit taamatut aalajangertoqarnera annertuumik isornartorsiorpaat
Uuliasioqatigiiffiup Shellip Alaskami aasaru uuliasiorluni qillerinissamut pilersaaruteqarnini naatsumik nalunaarutigaa sisamanngornermi.
Avatangiisinut illersuiniaqatigiiffiup Greenpeacep taamatut nalunaaruteqartoqarnera ernumanartoqartillugulu ajuusaarnartippaa.
- Taamatut aalajangerneq paasinanngitsuuvoq akisussaassuseqannginnerullunilu. Issittumimi uuliasiorneq aarlerinartorujussuuvoq. Taamatut aalajangerneq siunissami ajutoortoqarneranik kinguneqarsinnaavoq, tamanna aningaasaliisunut kisimi eqqarsaatigineqanngilaq, aamma Issittumi nalinginnaanngitsumi pinngortitamut atuuppoq, Greenpeacemi Issittumi akisussaasoq, Jon Burgwald allappoq.
- Shellip uuliasiornerani siunissami iluarsineqarsinnaanngitsumik ajutoortoqarsinnaavoq. Shellip Alaskami uuliasiorniarnerani isumannaallisaaneq USA-mit isornartorsiorneqartareerpoq. Amerikap imartaani uuliamik qillerineq Obamamit unitsinneqartariaqarpoq, Burgwald allappoq. Shellip Alaskami uuliasiornerani 2012-mi assigiinngitsunik ajutoorpoq.
Ajutoornerit pissutigisaannik Shellip Alaskami uuliasiornini unitsikkallarpaa.
Kalaallit Nunaanni uuliasiornissamut misissuinissat akuersissutigineqartut ataani takuneqarsinnaapput. Nunatta avannaata kitaani, Kap Farvelimi aamma Nunatta avannaata kangiani uulisioqatigiiffissuit uuliasiornissamut misissuinissamut akuersissuteqarput. Kalaallit Nunaata uuliasioqatigiiffia, Nunaoil A/S, misissuinernut tamanut 18-iusunut peqataassaaq