sipaarniuteqarnerit
Sipaarniartoqarneratigut Issittumi Sakkutooqarfiup attaveqaqatigiinnermut immikkoortortaa eqqorneqassasoq
Issittumi Sakkutooqarfimmi attaveqaqatigiinnermut atorfiup taamaatinneqarnissaanik aalajangiussaq ajorluinnartuuvoq. Sakkutooqarnermi sipaarniutigineqarniartut pillugit ilisimatooq Syddansk Universitetimeersoq oqarpoq.
Missingersuutinik misissueqqissaartoqarneratigut tusagassiisarnermut attaveqaqatigiinnermullu immikkoortortat, sakkutooqarnerup aaqqissuussaanerani ullumikkut immikkoorlutik inissisimasut, ataatsimoortinneqalernissaannik siunnersuut, Danmarkimi naalakkersuisut Illersornissamut siunnersuutaanni sipaarniutissatut siunnersuutigineqartut ilagaat.
Taamaalilluni tamatuma kinguneranik Issittumi Sakkutooqarfimmi attaveqaqatigiinnermut atorfik Danmarkimut nuunneqassaaq aamma innuttaasunut attaveqarneq tappavanngaanniit ingerlanneqalissalluni.
Sermitsiaq allappoq.
Missingersuutinik misissueqqissaarnermi oqaatigineqarpoq tamatuma kingunerissagaa sipaarniuteqarnikkut najukkami peqataaneq najukkamullu ilisimaarinninneq minnerulersinneqassasut, tamatumani ilanngullugit attaveqaqatigiinnermut tusagassiuuteqarnermut, nittartakkanut tapiissutit aamma immikkut ilisimasanut tunngasuunngitsunut tapersiissutit.
Tamakku saniatigut aarleqqutigineqarpoq sakkutooqarnerup iluani attaveqaqatigiinnerup tunulliunneqarnissaa, aamma avatangiisinut qaninnernut attaveqarneq ilungersunarnerulissaaq aamma »najukkami tusagassiuutit Issittumi Sakkutooqarfimmut toqqaannartumik saaffiginnissinnaajunnaarpata, tamanna matoqqanerulernertut isigineqarsinnaassasoq«, missingersuutinik misissueqqissaarnermi oqaatigineqarpoq.
Tamanna aarlerinartoqaraluartoq Danmarkimi naalakkersuisut sipaarniutigineqartussat illersornissamut isumaqatigiinniutissatut ilannguppaat, taakkulu partiini illersornissamut isumaqatigiissuteqartussani oqallisigineqartussanngorlutik.
Attaveqaqatigiinnerup qitiusumut nuunneqarnissaanik siunnersuut Issittumi politikkimut ilisimatuup Jon Rahbek-Clemmensenip tapersinngilaa.
- Issittumi Sakkutooqarfimmi attaveqaqatigiinnermut atorfiup atorunnaarsinneqarnissaanik aalajangiisoqassappat tamanna pitsaanngeqisumik aalajangiinerussaaq. Issittumi Sakkutooqarfik tassaavoq naalagaaffeqatigiinnerup iluaqutaaneranut Kalaallit Nunaanni erseqqinnerpaat ilaat.
Allaaserisaq tamakkerlugu sapaatip-akunnerani Sermitsiaq aviisimi saqqummertumi atuaruk. Aviisi uani pisiariuk: