attaveqaatit
Sisimiuni Kangerlussuarmilu sakkortusaavik attaveeruppoq
Sisimiuni aamma Kangerlussuarmi nalunaarasuartaatitigut attaveqartoqarsinnaajunnaarallarpoq
Sakkortusaavimmi attaveeruttoqarnera Tele-Postip sisamanngornermi ualikkut nalunaarutigaa. Attaveeruttoqarpoq sakkortusaaveqarfimmi DYE ONE-mi, silalu pissutigalugu tallimanngornermi ullaakkut aatsaat tassunga timmisoqarsinnaavoq.
Attaveerunnermi eqqorneqarput mobili, telefoni nalinginnaasoq, internet, VHF aamma KNR radio aamma TV attaveqanngillat. Tassani pineqarput innuttaasut aammalu inuussutissarsiummik ingerlatallit attaveqaataat.
Attaveerunnermit eqqugaasut illoqarfiit nunaqarfiillu pillugit maannakkuugallartoq Tele-Post imatut ilisimatitsivoq
- Kangerlussuarmi telefoninut nalinginnaasunut attaveqaat atorsinnaavoq København aqqutigalugu qaammataasamut maannakkut attavilerneqarmata, tassa kisianni telefonit nalinginnaasut kisimik atorsinnaapput.
- Nunaqarfimmi Itillimi nunaqarfiup iluani sianertoqarsinnaavoq aammalu telefoni nalinginnaasoq atorlugu Sisimiunut sianertoqarsinnaalluni
- Sisimiut illoqarfiani telefoni nalinginnaasoq atorlugu sianertoqarsinnaavoq aamma Sisimiunut aammalu Sisimiuniit illoqarfinnut allanut sianertoqarsinnaavoq, allakkulli attaveqarsinnaanerit atorsinnaanngillat.
- Nunaqarfimmi Sarfannguani attaveqaatit tamarmik atorneqarsinnaanngillat.
Tele-Postip timmisartoq King Air aammalu helikopteri attartorpai, taakku teknikerit atortullu Nuummiit Kangerlussuarmut tassanngaanniillu DYE ONE-mut Sisimiut kujataatungaani Qaqqatoqqamiittumut ingerlattussaavaat. Silali pissutigalugu tallimanngornermi aatsaat ullaaralaakkut nal. 7.00 timmisoqarsinnaavoq. Maannakkuugallartoq Tele-Postip oqaatigineqarsinnaanngilaa attaveqaateqarnerup qaqugu iluarsisimanissaa.