Sisorarfiit: Biilinut inissat amigarnerat aaqqinneqassaaq
Nuummi mittarfiup eqqaani inuussutissarsiorfissamik nutaamik ilusilersuinermut atatillugu majuartaatip Sisorarfiit biilinik unittarfinnik amerlanerusunik pisariaqartitsisoqarnera tikkuarpaa. Kommuneqarfik Sermersuup kissaat akuersaarpaa, kissaatigisaatali ilaannaa piviusunngussaaq.
Kommunip pilersaarusiorneranut tapiliussaq pillugu tikittarfissap nutaap illuatungaani, majuartaammit Eqalugalissuit Tasiata tungaanut ingerlaarfiani inuussutissarsiorfissamik nutaamik ilusilersuinermut atatillugu, tusarniaanermut Sisorarfiit ingerlatsisuat Bruno Heilmann akissuteqarpoq.
- Sisorarfiit- Majuartaat ukiukkut orninneqarnerpaajusarpoq, majuartaammik atuisut 13.000-iusarlutik. Majuartaatip biilinut inissiisarfia inuit biiliinik ulikkaartarpoq. Biilit tamarmik majuartaatip biilinut inissiisarfiani inissaqarneq ajorput taamaattumillu atsinnerusumi Air Greenlandip inissiisarfiani inissiiffissarsisarlutik. Biilit aqqusernup sinaani Air Greenlandillu inissiisarfiani inissisimasut aputaajaanermut akornutaasarput sumiiffimilu aputaajaassuarnik aputaajaaneq ulorianarsisarluni. Isumannaannerpaanngilaq, inunnik biilinillu annertuumik ajutoorfiusinnaavortaaq. Majuartaatip biilinut inissiisarfianut aqqut pioreersoq matuneqartariaqarpoq taarsiullugulu aqqusineq pingaarnermiit KAIR/Munckip allaffeqarfigigallagaa saneqqullugu majuartaatip biilinut inissiisarfianut aqqusinniortoqartariaqarluni, Bruno Heilmann taama siunnersuuteqarpoq.
Ingerlatsiviup Bruno Heilmannip isumaa isumaqatigaa.
- Ingerlatsiviulli tikkuarpaa nunaminertat inuussutissarsiortunut uani atugassanngortitsinikkut tamaani biilinut inissiisarfiit annertuumik allilerneqassammat. Ingerlatsiviup naliliinera tassaavoq, Sisorarfinnik atuisartut nalinginnaasumik suliffiup avataani takkuttarmata biilinut inissiisarfiit tamaani inuussutissarsiortunit atorneqartussat angallannerup annertusinera nammassinnaalluassagaat, taamaammat Sisorarfiit eqqaanni biilinut inissiisarfiit pioreersut allilernissaat pisariaqarpallaarunanngitsoq, oqaaseqaammi allassimavoq, nangillunilu:
Pitsaanermik tikissinnaalissagaat
- Imarpik qulaallugu mittarfissaq ammarneqarpat immikkoortup tamarmi tikinneqarsinnaanera tamanit atorneqarsinnaasunik angallassissutit pitsaanermik tikissinnaalissagaat naatsorsuutigineqarpoq, tamannalu angallannerup ilaanut iluaqutaassasoq naatsorsuutigineqarluni.
Aqquserngup ingerlavissaa majuartaammik ingerlatsisup siunnersuutigisaa ingerlatsivimmit akuerineqarpoq, maannalu inaarutaasumik missingersuummi majuartaatip biilit unittarfianit sanaartorfippassuarnit mittarfimmi akunnittarfissap tungaanut aqqusineq sananeqarpoq, taanna mittarfiup nutaap tikittarfianut qaninnerpaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...