Siumut Inatsisartuni ilaasortaatitaanni amerlanerussuteqartut Kim soraarsikkumavaat
Siumut Inatsisartuni ilaasortaatitaanni amerlanerussuteqartut ataasinngornermi unnukkut tusagassiutinut nalunaaruteqarlutik piumasaraat, Naalakkersuisut siulittaasuat, Kim Kielsen tunuassasoq.
Siumut sinnerlugu Inatsisartuni ilaasortani quliusuni arfinillit, kiisalu Naalakkersuisuni ilaasortaq ataaseq, Siumut siulittaasuannut taamatullu Naalakkersuisut siulittaasuannut tatiginnikkunnaarlutik nalunaaruteqarput. Taakku piumasaraat partiimi siulittaasutut Naalakkersuisullu siulittaasuattut tunuassasoq. Ataasinngornermi unnukkut tusagassiutinut nalunaaruteqarlutik taama allapput.
- Piffissami sivitsortumi partii Siumup ilumini imaannaanngitsumi ilungersunarluinnartumilu inissisimavoq, siulittaasup innuttaasunik kiisalu Inatsisartunut qinikkanik ataqqinninnginnera tusaajumananilu naaperiarfigineqarsinnaanngittarnera peqqutigalugu. Tamannalu
attanneqarsinnaanngilaq, tusagassiutinut nalunaaruteqarlutik allapput.
Ilaasortat arlaleriarlutik erseqqissaartigaat tunuartitsineq qinersinermik kinguneqartariaqanngitsoq, politikerit iluminni aaqqiissutissamik nassaarsinnaappata.
Allakkiaq qaammatit marluk matuma siorna nassiunneqartoq
Atsiortut arfineq-marluusut partiip siulersuisuunerinut Siumullu ataani immikkoortortarfinnut tamanut allakkiamik nassiussimasut ukuupput:
- Anders OIsen
- Nikkulaat Jerimiassen
- Henrik Fleischer
- Erik Jensen
- Laura Taunajik
- Jens Danielsen
- Hermann Berthelsen
Allakkiami piumasarineqarpoq partii politikkimik ingerlatsinera arlalitsigut aaqqinneqassasoq, atsiortuusut isumaqaramik Siumut innuttaasunut neriorsuilussiinnarsimasoq.
Neriorsuutigineqartut uku allakkiami assersuutigineqarput:
- 6. december 2018 Naalakkersuisut qaleralittassanik 2.035 tonsinik pisasseeqqipput. Pisassiissutigineqartut tamakkerlugit Royal Greenlandimut tunniunneqarput, naak Naalakkersuisoqatigiit isumaqatigiissutaanni 2017-imi atsiorneqartumi anguniarneqaraluartoq, aalisarnermik inuussutissarsiuteqartut nunaqavissut salliutinneqassasut kiisalu inuusuttut aalisartut periarfissaat pitsaanerusumik sinaakkusersorneqassasoq.
- 10.januar 2019 Naalakkersuisut qilalugartassanik aalajangiipput. Qilalugartassalli nungupallammata politikerit arlallit piumasaqarput Naalakkersuisut qilalugartassanik pisasseeqqissasut, Naalakkersuisulli tamanna itigartitsissutigaat. Naalakkersuisut siulittaasuat maajip 29-ani 2019-imi apeqqarissaarfigineqarnermini naqissuseqqippaa qilalugartassat amerlineqassanngitsut. Taama aalajangertoqarpoq naak naalakkersuisoqatigiit isumaqatigiissutaanni inuussutissarsiutigalugu piniartut sunngiffimmilu pinialuttartut salliunneqarnissaat isumaqatigiissutigineqaraluartoq.
- Paragraf 37 atorlugu apeqquteqaatinut akissuteqaatit arlallit Naalakkersuisuneersut, Siumut politikkianut malinninngillat. Tamanna isiginngitsuusaarneqaannarsinnaanngilaq.
Allakkiaq ersarissumik akineqanngitsoq
Atsiortut arfineq-marluusut tusagassiutinut nalunaarutiminni erseqqissaatigaat siulittaasortik saaffigisarsimallugu ataatsimeeqatigiumallugu, suleqatigiinnerup pitsaasup attatiinnarnissaa anguniarlugu. Tamanni iluatsissimanngilaq.
- Taamaattumik matumuuna Siulersuisuunernut kiisalu immikkoortortaqarfinnut kaammattuutigaarput, ullumikkumiit Siumup siulittaasua malittarisassat malillugit tunuarnissaanik
aaliangiissuteqaqqullugit qinigaaffiullu sinnerani, siusinnerusukkut misilittakkat inatsisillu malillugit, aaqqiissummik iliuuseqaqqullugit, ikerinnakkut qinersinissaq aqqutiginngikkaluarlugu, tusagassiutinut nalunaarutiminni allapput.