Siumut: Polar Aassik qaqinneqartariaqarpoq
Kilisaat Qasigiannguit eqqaani kivisimasoq qaqinneqartariaqartoq, Kommune Qeqertalimmi Siumut gruppiat taama isumaqarpoq. Qeqertarsuup tunuani aalisarnermik inuussutissarsiuteqartut amerlammata kilisaat sukkanerpaamik qaqinneqartariaqarpoq, gruppimi siulittaasoq, Aqqa Samuelsen oqarpoq.
Polar Seafoodip kilisaataa Polar Aassik Qasigiannguit ungasinngisaanni martsip 17-iani 2021-mi kivisoq immap naqqaniit qaqinneqartariaqartoq. Kommune Qeqertalimmi Siumut gruppiani siulittaasoq Aqqa Samuelsen taama isumaqarpoq.
Kilisaat ulluni marlunni ikuallareerluni kivivoq, maannalu immap naqqani 312 meterisut ititigisumiilluni.
- Imartarput avatangiiserpullu inuussutissarsiornikkut toqqammavittut pinngitsoorneqarsinnaanngitsoq pingaarutilittullu inissisimasoq, ukiuni arlalinni mingutsinneqartussanngornera akuersaanngilarput, Aqqa Samuelsen oqarpoq.
Kilisaat kivinikoq qaqinneqanngippat, taava Polar Aassiup ikummatissanut tankii imaaneqartariaqartut, Siumumeersut piumasaqarput. Mingutsitsinermi minnerpaaffimminiitariaqarpoq.
- Imartatsinnik avatangiisitsinnillu mingutsitsineq minnerpaaffilerniarlugu Qasigiannguit avatinnguani kilisaat kivisoq piaartumik qaqinneqarnissaa sulissutigineqartariaqarpoq, qaqinneqarsinnaaneralu ajornarpat ikummatissanut tankii imaarneqarnissaat pisariaqarpoq, Kommune Qeqertalimmi Siumut piumasaqarput.
Upalungaarsimasunut piumasaqaat
Qeqertarsuup Tunua Nunatsinni aalisarfiunerpaat ilaanniippoq. Taamaammat upalungaarsimasut annertunerusumik mingutsitsisoqarsinnaanera eqqarsaatigalugu sooq annertunerusumik annaassiniarsimannginnerat, Kommune Qeqertalimmi Siumup paasisinnaanngilaa. Polar Aassiup kivinera ajunaarnersuartut isigineqartariaqartoq, taakku isumaqarput.
- Qasigiannguit avatinnguani kilisaat kivisoq ajunaarnersuartut oqaatigineqarsinnaasoq qarsupinneqarsinnaanngilaq suusupagineqarsinnaananilu. Pisuni ajunaarnersuartut ittuni imaatigullu annertuumik ajutoortoqartillugu nuna tamakkerlugu sillimaniarneq pitsaanerusariaqarpoq, Aqqa Samuelsen oqarpoq.
Qasigiannguini innuttaasut kilisaatip kivinera eqqarsaatigalugu oqartussaniit erseqqissumik paasitinneqarsimassagaluartut, Kommune Qeqertalimmi Siumut gruppia aamma isumaqarpoq.
Kilisaat kivisimasoq pillugu Inatsisartut suleriaasianni paragraf 37 naapertorlugu Siumumeersup Jess Svanep, Avatangiisit pillugit Naalakkersuisuusimasup, Naalakkersuisunut maajip arferngani apeqqutigaa.