Siunissaq meeqqat siunissaraat
Kommuneqarfik Sermersuup borgmesteria Asii Chemnitz Narup ulloq unuiattut ullorsiorfik aallarnerlugu Nuutoqqami oqaaseqarnermini taamatut oqarpoq.
Borgmesterip oqaaseqarnermini kulturikkut attaveqaatit ataatsimoorutigisagut pingaartuunerarpai.
– Kulturikkut tunngavigisat nukittoqutaapput - aamma allanngoriartornerup nalaani, Asii Chemnitz Narup oqarpoq kulturillu ataatsimoornermik, ineriartornermik kinaassutsimillu pilersitsisarnera tikkuarlugu.
Eqqumiitsuliornikkut periarfissanik Kommuneqarfik Sermersuumi tamatsinnut nuannaarutaasussanik nukittorsaasinnaanerput nuannaarutigaara, borgmesteri oqarpoq Kalaallit Nunaatalu avataanut aamma kulturikkut atassuteqanerput eqqaasitsissutigalugu.
– ICC sapaatip akunnerani uani illoqarfitsinni ataatsimeersuartussaavoq - naggueqatigut Inuit kangianeersut kitaaneersullu nipilersornikkut, misigisatigut pinnguarnikkullu - tamatta ataatsimoortuigisatsigut - peqataassapput, borgmesteri oqarpoq.
'Siunissarli meeqqat siunissarimmassuk' tassunga pisussaaffeqarnerput immikkut pingaartuunerarpaa.
– Meeratagut pitsaanerpaanik atugassaqartariaqarput namminneq siunissartik ingerlassinnaajumallugu. Meeqqat isumalluutit tamaasa pigaat - illersorneqartariaqarput ineriartortinneqartariaqrlutillu, borgmesteri erseqqissaavoq nangillunilu:
– 'Meeqqat siunissaapput' - siunissarli kinguaariit utoqqaanerusut pilersitaat tunngavigalugit sananeqassaaq.
– Qutsavigerujussuarpatsigit neriullutalu uagut utoqqalinissarput isumannaarumaarissi, Asii Chemnitz Narup ataasinngormat ullaakkut Nuutoqqami oqarpoq.
Ullormi inuiattut ullorsiorfimmi assilisat Sermitsiaq.AG-miittut uuguna takukkit.