Sivisuumik naalliutitsisimaneq sakkortuumik pineqaatissiinermik kinguneqartitsisoq

Islandimi ukiuni 19-ini paarnaarussanngortitsineq eqqartuussutaavoq sakkortooq. Peqqarniitsumimmi toqutsineq ukiuni 16-ini paarnaarussassanngortitaanermik kinguneqartarpoq. Thomas Møller Olsenillu ikiaroornartumik 20 kilomik eqqusseriaraluarluni eqqartuunneqarnera ilanngukkaluaraanni, ukiuni qulini kingullerni aatsaat taamak sakkortutigisumik Islandimi eqqartuussisoqarpoq.

Eqqartuussinermi unnerluussisoq Kolbrún Benediktsdóttirip eqqartuussut naammagisimaarpaa.

- Oqaatigarput eqqartuussiviup malippaa, taanna ruv.is-imut oqarpoq.

Birna Brjánsdóttirimut nakuuserneq ingasattajaarlunilu annertuumik peqqarniisertoqarsimasoq, eqqartuussiviup eqqartuussummi maluginiarsimagaa, ruv.is aamma mbl.is allapput. Thomas Møller Olsenip taanna biilimi attartorneqarsimasumi naalliutseriarlugu suli uumasoq imaanut nakkartissimavaa.

AAMMA ATUARUK:

Aammattaaq eqqartuussivup Thomas Møller Olsenip pinerluuteqarsimanerminik isertuussiniarsarisimanera, Polar Nanumilu inuttaaqatiminik pisuutitseriaraluarnera.

Eqqartuussinermimi nassuiaasimavoq, inuttaaqataata allap biili attartukkami Birna Brjánsdóttiri ingerlaqatigisimagaa namminerlu qimataasimalluni. Taamatullu nassuiaateqarneq eqqartuussinermi uppernarsaatinut nassuiaatigineqartunullu naapertuutinngimmata uppernanngitsutut naliliiffigaat.

Eqqartuussutip oqaatigineqarnerani Thomas Møller Olsen eqqartuussivimmi najuussimanngilaq. Illersuisuata Páll Rúnar M. Kristjánssonip eqqartuussut islandimiut tusagassiuuteqarfiinut oqaaseqarfigiumasimanngilaa.

Thomas Møller Olsenip paarnaarussassanngortitaanermi saniatigut Birnap angajoqqaavinut 450.000 koruunit eqqartuussinerulli ingerlanneqarneranut 1,2 millionit koruunit taarsigassarilerpai.

Taanna Eeqqartuussutip suliaritassanngorteqqinnissaanut aalajangernissamut sapaatip-akunnerini sisamani periarfissaqarpoq.